KIA investigando con un homber a yega e muraya sin wordo detecta

ORANJESTAD - Tin un investigacion andando den KIA pa haya sa con bin un persona por a yega asina cerca di e muraya di e prizon, sin cu el a wordo detecta. Un persona a haci un 'joke' recientemente door di filma su mes yegando un di e murayanan di KIA pafo, sin cu el a wordo detecta y of gara y a pone riba facebook. "Si mi yega asina cerca di un muraya di un prizon na cualkier otro pais, lo mi a wordo tira of rementa pa un mina" e persona aki ta bisa. "Mi ta stima Aruba". Hunto cu ne, el a pone e video cu e mes a traha di su mes. Director di KIA, Rocco Tjon diamars mainta tempran a bisa NoticiaCla.com cu ta investigando tambe ki regla y ley e persona aki a viola y con lo atende cu ne despues. 

HEKWERK NO OPTIMAL

Den mesun rosea Tjon ta admiti cu e hekwerk rond di KIA pafo no ta esun miho of den e miho estado. "No ta ningun secrecto cu nan no ta den bon condicion" Tjon a confirma na NoticiaCla.com. Sinembargo no ta nada no comun cu na otro partinan di mundo tambe ora cu tin un prizon den ciudad, cu hende por yega na e muraya, e director a sigui bisa. "Esey no ta kita afo cu nos tin diferente proyecto andando pa keda hisa e seguridad mas tanto posibel pasobra esey ta e prioridadnan pa warda e prizon safe pa personal y detenidonan". 

E VIDEO

E loke ta wak riba e video, no ta normal, y zoiezo Tjon mes no ta hay'e normal tampoco. Mes momento mester mira si, e motibo di e persona cu a yega asina leu, e director a sigui bisa. Den pasado algun persona tambe a yega cerca di KIA cu e intencion di pasa contrabanda paden via e muraya, pero a wordo frustra pa e personal atento cu a mira esey mesora. "Esey tambe ta importante cu mester mira e indole y cu ki intencion e persona ta yega cerca di e muraya" Esey no ta haci e acto uno menos bon, si un persona pa cualkier meta (bon of malo), por yega asina cerca sin mas. "Lagami ta duidelijk si. Nos no ta keur e goed y nos lo haci todo den nos alcance pa mehora e situacion aki tambe" Tjon a bisa. 

FAYO DEN VIGILANCIA

Basa riba e hechonan recien y esun awor, NoticiaCla.com a puntra si aki por papia di fayo di seguridad cu no tabata atento e biaha aki (compara cu ora cu a frustra e personanan biaha pasa di purba pasa contrabanda) cu e persona por a yega asina cerca. "No.. Si bo wak e video tambe, ta algo di algun seconde. E ta set su telefon, core yega na e muraya, y ta bay mesora. Dus uiteraard nos ta bay investiga e asunto aki intern. Mi no kier tira culpa mesora riba personeel. Absolutamente cu nos, mirando cu ta algo di algun seconde y nos no sa kico precies por a sosode" Tjon a sigui bisa. 

DRECHA E HEKWERK ROND DI KIA

Tjon a splica cu ta trahando riba un asina yama 'veiligheidsplan' cu diferente partnernan na Aruba y ta purba tene cuenta cu e normanan internacional pa asina keda mehora e safety di e prizon. "Y ora nos papia di safety, beveiliging no tur ora ta encera e infrastructura so pero tambe proceso" Tjon a bisa. Asina tipo di casonan manera a sosode awor, por wordo evita. 

CONSECUENCIA PA ESUN CU A HACIE

Pa loke ta e consecuencia pa e homber cu a haci e 'joke' aki, Tjon a mustra cu tipo di jokenan asina ta basta serio. "Na final di dia toch con cu ta e por a afecta e seguridad di e personeel den e instituut tambe. Nos ta bay wak con lo atende cu e asunto aki" e director a sigui bisa.