Enseñansa Special Secundario awor ta parti di Scol Publico

Oranjestad - E formacion di e asina yama “Aspirant Opleiding” no ta bay resorta mas bao di Stichting Educacion Profesional Basico (SEPB) sino lo cay awor bao di Oficina di Scolnan Publico (Dienst Publieke Scholen). Den un tempo di 6 siman a cambia e formacion, informa mayornan y alumnonan y traha un master plan cu docentenan y esunnan encarga. Aspirant opleiding, esta “Voorgezet Speciaal Onderwijs”, tabata un division di Stichting Educacion Profesional Basico y tabata e continuacion di scolnan special basico. Ta trata aki di e educacion special pa alumno cu tin un nivel special di siñamento. Den termino di 3 aña e alumno por haya educacion practico pa por drenta mercado laboral. Despues di varios aña di reunionnan a dicidi pa tuma e paso aki pa e aña escolar nobo. Mientrastanto a nombra Alexander Figaroa como e director nobo di e scol. E ta un docente cu ta sali for di E.P.B., pues cu un conocemento amplio riba “Beroepsonderwijs” y tambe experencia con pa atende cu studiantenan considera un “Aspirant”. E scol situa na Santa Cruz ta keda ubica eynan y ta habri su portanan diabierna awor dia 15 di Augustus. E scol di San Nicolas lo ta temporalmente na Savaneta mientras cu lo construi un edificio nobo na San Nicolas. E scol na Savaneta lo habri oficialmente dia 1 di september proximo.