Rumannan Sydow ta pone Aruba den cuadro di honor na El Salvador den tennis

ORANJESTAD – Ekipo nacional di tennis a participa den e torneo JITIC 2016 cu a tuma luga na San Salvador, El Salvador di dia 23 pa 30 di juli ultimo. E torneo JITIC ta un evento prestigioso cu ta invita e miho hungadonan di Centroamerica y Caribe bou di 16 aña. E ekipo di Aruba a haci un tremendo prestacion den e torneo cu Patrick Sydow figurando na di 3 lugar den Singles y di 2 luga den Doubles hunto cu su ruman homber, Frederick Sydow.Despues di varios siman di entrenamento intenso, e ekipo, cu ta consisti diPatrick Sydow, Frederick Sydow, Alexson Hessels y Kevin Yarzagaray, hunto cu entrenador Claudio Martinez, a dirigi pa El Salvador tres dia prome cu e fecha inicial di e competencia pa asina ahusta na e clima y haltura di e ciudad.E prome dos dia di e torneo a ranca sali cu un ‘Round Robin’ pa wak ken lo cualifica pa e ‘Main Draw’ y sigura asina un luga entre e top 28 hungadonan di e region aki. Tur cuater hungador di e ekipo di Aruba a cualifica pa e ‘Main Draw’, cu Hessels na di 20 luga, Frederick Sydow na di 18, Yarzagaray na di 15 y Patrick Sydow na un excelente di tres luga, cual ta un resultado hopi bon pa Aruba.Entrenador Claudio Martinez a duna algun palabra tocante e resultado di e ekipo y nan desaroyo riba y pafo di e cancha. “Mi ta hopi contento di wak mi hungadonan obtene algun hopi bon resultado, pasobra nos a bin ta entrena hopi bon y ta great pa wak cu e trabou duro a duna su fruto. Mi hungadonan ainda ta hoben, loke ta nifica cu ainda nan tin pa siña riba y pafo di e cancha y cu, pa logra nan obhetivonan, tin un caminda largo ainda di trabou duro y dedicacion nan dilanti.”E ekipo di tennis di Aruba ya caba tin plan pa e proximo torneonan internacional. Patrick Sydow ta bay participa den un evento di ITF na Monterrey, Mexico aki dos siman; Frederick Sydow ta bay hunga na un evento di ITF na Barquisimeto, Venezuela y Kevin Yarzagaray ta bay competi den dos torneo di ITF na St. Vincent y Tobago. Nos ta desea e hungadonan importante aki hopi suerte!