Mikel Schreuders a mira accion den e piscina Olimpico na Rio

RIO DE JANEIRO -  E hoben Mikel Schreuders tambe a mira accion diadomingo merdia ora local ora cu e ta haci su aparicion den e Weganan Olimpico pa prome biaha y cu solamente 17 aña di edad. Na ESPN nan a comenta cu Mikel por ta satisfecho cu su prome presentacion den un Olympiada mirando su edad y capacidad. Mikel a landa e 200m freestyle den cual e la yega e marca pa por ta forma parti di e Weganan Olimpico di Rio. Mester bisa cu den e prome parti di e evento Mikel a sali bon sigur e prome 50m unda e ta logra un tempo split di 26.03, despues riba e 100m, Mikel a keda basta consistente y ta marca un tempo split di 54.38 e momento ey bon pa di 5 luga pero na 150m por a ripara cu e cansancio a drenta e curpa unda Mikel ta marca un tempo split di 1.23.70 den e ultimo cincuenta meter pa finalisa Mikel ta purba duna tur cu tin pa asina finalisa e 200m den 1.55.10. Esaki con cu bay bini no ta e miho tempo di e atleta Mikel Schreuders kende su miho marca riba e 200m freestyleta 1.51.17. Apesar cu Mikel ya tin varios experiencia di nivel mundial tog e Weganan Olimpico ta keda un evento di clase apart unda e mihonan di mundo ta bini hunto. Den un combersacion cu Mikel e la conta nos cu na comienso e la bay bon pero despues na mitad caminda tog e la sinti e cansancio. Apesar di tur cos e ta contento cu e la traha duro pa yega aki na Rio. Mas cu claro Mikel lo sigui persevera pa purba yega Tokyo 2020 den e miho forma posibel y den mas evento. Un pabien sigur na e atleta Mikel Schreuders. Relato y fotos di Seever Krozendijk