Judoka Jayme Mata ta logra yega e round di 16 den e Weganan Olimpico di Rio 2016

RIO DE JANEIRO -  Un prestacion satisfactorio ta loke nos por bisa di e judoka Jayme Mata kende a logra yega e round di 16 den e Weganan Olimpico di Rio 2016. Diadomingo mainta e Weganan Olimpico di Rio de Janeiro a inicia pa e delegacion di Aruba unda e prome atleta esta e judoka Jayme Mata a mira accion.  Jayme su combate tabata den e categoria di 66kg y pa 10.49 ora di Brasil e la bringa su combate den e prome rond contra di Joe Mahit cu ta bini di e isla Pacifico, Vanuatu. Un contrincante desconoci cu masha tiki informacion riba dje. Pa loke su combate contra di Mahit, Jayme tabata determina unda e la sali prome cu cuatela studiando Mahit su movecionnan pero segun e combate ta avansa Jayme haya mas confiansa den su mes y ta domina su contrincante por completo. Dado momento den un movecion explosivo Jayme ta logra un Ippon cual ta e puntuacion mas halto den judo y aki e pelea ta termina mesora 100 – 0 na su fabor. Den e round di 16, Jayme ta topa Sobirov di Uzbeskistan kende ta un tremendo pleador di nivel mundial. Mester bisa cu Sobirov a sa na sorpresa Jayme tempran unda e ta gana Jayme apenas e combate a inicia. Jayme no a spera e sorpresa ey unda Sobirov a gare den un choke y mester a tap. Mester bisa cu apesar a bini di un lesion grave na su kruisband, Jayme a demostra un progreso enorme, un atleta cu a keda persevera y kere den su mes pa e la yega na clasifica pa e Weganan di Rio 2016. E ta mucho mas madura y pasa un temporada di clasificacion di casi dos aña prome cu e la yega Rio. Jayme Mata ya tabata tin su experiencia Olimpico unda 4 aña pasa e la competi den e Weganan Olimpico di Londres, e tempo ey Jayme a cay venci den e prome rond contra Uruita di Spaña kende na Rio a bay afo den e prome rond. Un pabien sigur na e atleta Jayme Mata y su coach Fiderd Vis como tambe na e federacion di judo y COA. Relato y foto Seever Krozendijk