K-9 di Polis cu conseho na muchanan di ASU Kamp

ORANJESTAD - ASU a organisa un vakantie kamp hunto cu actividadnan basa riba movecion y deporte, combina cu educacion. Vianney Coffie tabata encarga di parti di Cuerpo Policial, pa hunto cu e team di K-9 haci un demostracion na hobennan di e actividad y habilidad nan di e cachonan y nan handlernan. E demostracion a tuma luga Centro Deportivo Frans Figaroa na Noord.

Vianney Coffie a remarca cu tanto e miembronan di Cuerpo Policial, como nan partner canino a disfruta tin un area mas amplio na nan disposicion pa duna e demostracion di nan trabou y habilidad nan. El a agrega cu tur demostracion cu Cuerpo Policial duna ta bin cu un mensahe y ta parti di nan actividadnan di conscientisacion.

For di luna pasa, ora cu scolnan basico a integra presentacionnan di Cuerpo Policial den e proceso pa tuma despedida di nan muchanan di zesde klas, te cu apenas e prome siman di vakantie, entre 1300 pa 1500 mucha y hoben a ricibi demostracionnan for di Cuerpo Policial. Esaki ta un “record” pa Polis y nan tin hopi peticion mas pa cumpli cu nan prome cu Vakantie Grandi caba.

Vianney Coffie a laga sa cu loke ta mas importante pa Cuerpo Policial ta pa haya confirmacion cu nan mensahe a yega e muchanan. Ora topa nan bek riba caya cu nan mayornan ta un placer pa wak cu nan ta reconoce e miembronan di Cuerpo Policial y ta cuminda nan, pero principalmente cu nan ta conta nan mayornan loke nan a siña.

Junior Dake, kende ta traha cu e departamento di “Schoolsport en recreatie” di IBISA a conta cu ta prome biaha cu ela presencia un demostracion di e team di K-9 y e tabata impresionante. E muchanan a keda encanta cu e experiencia unico, ela comenta, nan lo keda papia di dje sigur pa hopi tempo.

E kamp di ASU ta uno hopi varia, cu ta combina stimulacion pa e miembronan di comunidad mas hoben move mas, cu educacion y conscientisacion tocante di varios topico.