Cu excepcion di 4 scol, aña escolar ta habri diahuebs

ORANJESTAD – Cu excepcion di 4 scol, tur otro scol ta cuminsa nan aña escolar diahuebs proximo. Un periodo sigur marcando un comienso di algo importante den bida di un mucha. Pa otronan, e ta un comienso di un otro aña escolar. Pa esnan di e 3 scolnan afecta, nan tin cu warda un poco mas largo. E ta varia entre 1 pa 7 dia prome cu nan tambe por cuminsa, y un scol ta custumbra di cuminsa riba un fecha mucho mas lew cu esnan di diahuebs.

Esnan cu no ta cuminsa scol mayan ta Mon Plaisir Kleuterschool sino un di mas lat, cu ta diabierna 15 di augustus. Esaki pasobra e trabounan extra no a keda cla na tempo. E positivo ta cu unabes cu nan cuminsa, nan ta haci esaki den nan scol ‘renoba’. Alumnonan di Mon Plaisir School si ta cuminsa nan lesnan normal riba diahuebs, y den nan scol ‘renoba’.

Augustinus College, cu tin hopi aña ta warda nan turno, porfin a yega na turno, pero cu consecuencia cu e alumnonan tin cu warda un siman mas esta te dia 20 di augustus, y nan ta cuminsa nan lesnan caminda Prins Bernard School tabata situa e aña escolar anterior. E renobacion di e scol ta cuminsa na october di e aña aki. Otro scol cu ta cuminsa cu les un siman mas laat ta Rosa College, esta dia 20 di augustus y ora cu nan cuminsa mes, nan ta cuminsa den e edificio di VAD riba Boulevard. E scol ta hopi deplorabel y no tin informacion ki dia ta cuminsa cu renobacion di e scol ey. Tur es tempo, nan ta haya les na e localidad ‘nobo’. Prins Bernhard School ta cuminsa su scol tambe den un otro edificio, ex SABA na San Nicolas, y nan prome dia di les ta 1 september. Esaki no ta nada straño pasobra semper nan a cuminsa nan lesnan riba e fecha ey. Loke ta resalta ta cu hopi trabou a keda pega pasobra e presupuesto 2014 ainda ta sin firma. Como tal placa no por a keda uza pa por a caba cu varios asunto di scol. Entre nan, e propio Colegio Cristo Rey cu ta cuminsa den nan edificio completamente renoba, ta haci esaki faltando algun material y mueblenan.