FTA ta hiba operador nobo di ex Aura casino corte

ORANJESTAD - E compania nobo cu lo kier tuma ex Aura casino over (di Occidental Hotel), tin te diabierna (mayan) pa bin cu un proposicion concreto (pa regla asunto di e trahadonan cu nan no a tuma), sino e sindicato ta hiba e operador corte. Asina e presidente di e sindicato FTA Hubert Dirksz a informa NoticiaCla.com recientemente. Awe mainta (diahuebs) Dirksz a confirma cu 'e desicion pa bay corte t'ey caba!". Nan no ta dispuesto pa warda mucho mas y como tal a pone e ultimatum aki siman pasa diahuebs. No obstante cu tin un acuerdo inicial cu e operador nobo, ainda no por concretisa nada y esey ta un problema pa e sindicato. 

GARANTIA DI TRABOU

"Te aworaki e trahadonan no tin ningun garantia di trabou" Dirksz a bisa. Loke si a wordo informa pa abogado di e compania nobo segun Dirksz, ta cu nan lo tuma 25 hende solamente debi na e espacio mas chikito cu tin. "Nos ta compronde esey y no a nenga ningun momento pa negosha riba esey" e presidente a sigui bisa. Pero e sorpresa ta cu aunke tin un ley (data di 1 april 2013) cu ta bisa cu na momento cu un compania cambia di doño, e mester tuma tur trahado cu tur derecho, esaki no ta tumando lugar pa e compania y cu a bisa cu nan (e compania nobo) no ta reconoce. "Eynan nos tin un problema serio. E doño nobo kier papia cu e trahadonan, pero ta para riba nan punto cu no tin ningun relacion cu nan. Tur e gastonan di 8 luna di salario no ta pa su cuenta sino pa e cuenta di e doño anterior" Dirksz a sigui bisa. Esey ta nifica cu e trahadonan lo tin cu cuminsa full di nobo y esey di parti di FTA nan ta totalmente den desacuerdo cu esaki.