California Lighthouse renoba, a bira victima di graffiti

ORANJESTAD - Cla pa wordo habri atrobe e luna aki, den oranan di marduga e faro na Lighthouse a keda vandalisa cu graffiti.  Esnan responsabel pa e edificio, Stichting Monumentenfonds Aruba (SMFA) a tuma nota cu a spuit graffiti riba e Faro di California cual ta den fase final di restauracion. E biaha aki no a pone e texto di 'pedofiel' sino e asunto di tereno y e nomber di Leoncita Arends cu su asunto di tereno.

FARO NO TA DI GOBIERNO 

SMFA a informa cu e Faro ta un propiedad di Stichting Monumentenfonds Aruba y no di gobierno.  SMFA su meta principal ta pa mantene nos monumentonan pa medio di projectonan y asina tambe mescos cu otro projectonan a haci un restauracion di e Ligthhouse completo. SMFA a inverti mas di un miyon den e proyecto aki pa asina por a restaura e faro di California.

NO TA PROME BIAHA

Lamentablemente esaki ta di tres biaha cu ta confronta cu graffiti riba e edificionan monumental cu ta pertenece na SMFA y debidamente nos ta haci e aangifte na polis cual lo ta e caso tambe awor cu a spuit riba e California Lighthouse.

RESPETA E EDIFICIONAN

"Nos ta pidi un biaha mas pa porfabor respeta e edificionan monumental cual ta parti importante di nos herencia cultural" e comunicado ta bisa.