Placa, ATA y jaloezie a crea impasse den gobierno actual

ORANJESTAD - E impasse actual den gobierno y e partido berde, tin di haber cu jaloersheid, placa y ATA. Ta papiando cu tin dos polo tanto den gobierno como den Parlamento di Aruba. Algo cu tras di cortina tanto minister(nan) como parlamentarionan ta papia di dje, pero no ta admitiendo publicamente. Mientras cu ta papiando di reunionnan interno pa purba soluciona e impasse, NoticiaCla.com tin confirma di hendenan hopi cerca den bestuurskantoor 'den e candela' politico, cu e reunionnan aki no a inclui minister Otmar Oduber ya cu e tabata den exterior y a yega Aruba diadomingo ultimo. Asercamento na e minister(nan) no a duna resultado tampoco. 

PROBLEMA TA PLACA 

Bek pa e problemanan actual, a compronde pues cu e presupuesto di ATA ta entre e problema, y mas sigur ta e problema principal. "Cualkier otro motibo pa e impase, ta un locura!", a wordo informa na NoticiaCla.com. Problema ta pasobra ATA ta generando placa awor cu e ministernan kier tin acceso na dje, pa resolve nan asuntonan, pero cu no ta logrando. Y, esey tin e ministernan rabia riba esun responsabel pa e departamento ey, y consecuentemente nan ta dividi. Y esey lo ta causando cu otro ministernan ta bringando e mandatario y cu awor tin un impasse serio den gabinete Mike Eman II. 

BIDA DI MINISTER IMPOSIBEL

Fuentenan den gobierno a splica cu ministernan cu mester di fondo, ta buscando esaki den ATA pero no por haya esaki. Como tal lo ta haciendo e bida di e mandatario di turismo imposibel. De hecho ta mustra cu ta un ironia cu un departamento cu desde Aruba su status aparte no por a keda cla pa wordo realisa y tabata costa solamente placa, awe ta bira e centro di e 'problema' den e gabinete. A dura 27 aña y 5 minister di turismo pa logra laga ATA genera fondonan miyonario pa cual tin bringamento. Un ATA pues cu tabata un peso financiero, awe ta genera miyones y bira e centro di e problema, causando problema serio entre e minister cu ta responsabel pa e cartera aki y su colega ministernan. Di otro banda, otro fuentenan ta mustra NoticiaCla.com cu esaki ta un issue, cu ta wordo uza, pero cu ta uze como 'excusa' pa resolve tur otro problema di pasado entre e ministernan. "Cu tin problema, ta sigur. Cu nan ta dividi, ta un hecho. Pero cu ta pa motibo di ATA, no ta berdad. E por ta un asunto, pero no esun principal" otro fuentenan aki a sigui bisa. 

METEMENTO DEN CARTERA DI OTRO

E hecho cu pa basta tempo caba tin metemento den cartera di otro, tambe a wordo menciona como un di e problemanan. Sinembargo cada minister (incluyendo esun di turismo) a desmenti esaki publicamente indicando cu esaki ta normal ora cu mester. Pero internamente esaki ta un otro asunto completo.