Reapertura CITGO hasta pa 1 september irealistico

ORANJESTAD - Parlamento lo no keda cla pa trata e leynan cu tin cu legitima e deal di CITGO pa e reapertura pa 1 di september awor. Asina NoticiaCla.com a compronde di su fuentenan cerca di e proceso di ley. Motibo ta cu e ley no ta na Raad van Advies ainda – esey NoticiaCla.com por a conclui for di e website di Raad van Advies - y asina nan lo no por trata y of keda cla cu nan conseho na tempo te pa nan entrega esaki bek. 

LEY PRESUPUESTO A YEGA RAAD VAN ADVIES

Un luna prome cu ley di presupuesto 2017 mester keda entrega na parlamento, RvA a ricibi esaki y lo ta ocupa cu ne pa por lo menos 3 siman. Mientrastanto RvA no a haya e ley di CITGO. Esey ta nifica tambe cu e reapertura di refineria lo mester wordo posponi atrobe. 

TRATA LEY

Pa e ley(nan) pa e deal di CITGO wordo trata den Parlamento, esaki mester yega y pasa cerca RvA prome. Si gobierno opta pa bypass RvA y mand'e Parlamento di biaha, pa ley, e ley(nan) aki (of cualkier ley cu no pasa RvA) ta bira invalido y lo wordo destrui pa conseho di minister di Reino Hulandes. Asina NoticiaCla.com a wordo notifica tambe. E hecho cu e ley(nan) di e CITGO deal no lo por pasa Parlamento prome cu 1 september, ta nifica pues cu pa e fecha ey e refineria no por haya luz berde pa cuminsa opera (legalmente).

PRESUPUESTO IRREALISTICO

E loke ta haci e presupuesto  irealistico, ta e hecho cu como cu no tin e detayes di e deal di CITGO, no a inclui esaki den e presupuesto, y como tal unabes cu e deal keda cla (aunke laat), e lo no refleha e realidad real financiero cu gobierno tin cu tene cuenta cu ne. Esey no kiermen cu gobierno no por funciona, sino mas bien, cu e no ta un bista real di loke ta pasando of lo pasa. Y esey ta haci'e un problema. 

CAFT

Recientemente CAft a sigura NoticiaCla.com cu sin CITGO den e pantaya mes, gobierno lo sa di genera suficiente fondo pa logra e metanan poni manera palabra cu e organo di supervision financiero. Sinembargo, cosnan por desaroya diferente si e loke cu gobierno a propone, no materialisa. Y sin operacion activo di e refineria (bou di CITGO), e ta debilita e situacion di gobierno aun ainda.