SETAR cu encuesta online pa midi satisfaccion di cliente

ORANJESTAD - Entrante diamars dia 2 di augustus 2016, SETAR lo cuminsa cu un encuesta online como metodo di sondeo di e satisfaccion di su clientenan. 

Den e prome fase, clientenan postpaid cu tin un e-mail adres registra na SETAR, tin e posibilidad di ricibi un e-mail den cual por bay na un link pa asina yena e encuesta. 

E motibo cu SETAR ta bay haci un encuesta general online entre su clientenan, ta pa haya sa kico ta e opinion y deseonan di e clientenan pa por sigui brinda nan e mihor servicio y productonan posibel.  

SETAR como un compania netamente Arubano, kier compronde e factornan cu ta fortalece e relacion cu su clientenan. Otro meta cu SETAR kier logra ta haya sa loke clientenan ta spera di e compania y tambe si nan ta recomenda SETAR.  

E encuesta di SETAR lo no inclui preguntanan personal, sino unicamente preguntanan tocante e servicio di SETAR.  

Iliandra Figaroa di e departamento di Customer Interfaces Support di SETAR cu ta encarga cu e projecto aki ta bisa: “Pa SETAR ta importante pa haya “feedback” di e clientenan. P’esey ta pidi y encurasha tur cliente cu ricibi e encuesta pa yena esaki y participa.”