WEB: Storing cu turbina 6 tabata motibo di blackout

ORANJESTAD – Investigacion preliminar di WEB ta mustra cu e blackout di diasabra tabata debi cu a surgi un storing den control di frecuencia di turbina 6 na WEB. Asina vocero di e compania, Asja Dongen, a informa dialuna den un comunicado. Segun e compania, diasabra dia 30 di juli ultimo den ora trempan di mainta a surgi un interupcion den produccion di coriente na WEB. Esaki a conduci na un blackout y ful Aruba a keda sin coriente. 

BARIONAN SIN CORIENTE

Algun bario di San Nicolas a keda sin awa tambe. Motibo ta cu e barionan aki ta conecta riba e tanki di awa di Sero Pretoe, cual ta pasando den un mantencion grandi. Consecuentemente e presion di awa pa e barionan aki ta ser regula pa pompnan electrico, cual no por a funciona debi na e blackout. 

SEIS ORA SIN CORIENTE

En total Aruba a keda ± 6 ora sin coriente, aunke varios bario a haña coriente dentro di un ora y mey caba. Gerencia di WEB ta gradici pueblo pa su comprension, y tambe ta gradici tecniconan di WEB y ELMAR pa nan bon cooperacion pa asina por a limita e periodo di e blackout. Pa medio di updates riba WEB su pagina di Facebook, WEB a mantene pueblo informa di e progreso y e tempo di espera pa recupera coriente.

STORING

Indicacion preliminar ta mustra cu e storing a origina den central di WEB. Asina director interino di WEB, sr. Richard Frank ta informa. A surgi un situacion di un storing y den casonan manera esun di diasabra, e sistema ta shut down automaticamente pa proteha empleadonan den planta, pero tambe pa evita daño na ekipo.

PAKICO NO POR EVITA BLACKOUT

Hopi ta esnan cu ta puntra si no por evita e blackout, siendo cu ta inverti hopi den ekipo. Sr. Frank ta splica cu aunke WEB ta inverti hopi, e hecho cu nos ta biba riba un isla y cu WEB ta e unico productor industrial di coriente, ta haci casi imposibel pa evita. Aruba no forma parti di un red continental di coriente. Pa e motibo ey si e planta di WEB cay afo, no tin e back up manera otro paisnan continental si tin. E tipo di storing cu a surgi diasabra tin un grado basta dificil pa contene. Durante e start up di e planta a experencia contratiempo tecnico. Esaki a tuma e tempo necesario pa resolve. Na momento di un interupcion di coriente of awa, comunidad ta exigi informacion al instante di kico a pasa y principalmente cuanto ta bay dura pa e situacion normalisa. Aunke pa WEB e prioridad e momento ey ta pa reestablece e situacion di suministro, pa medio di su pagina di Facebook, WEB a mantene comunidad informa di e progreso di recuperacion di coriente. Entretanto e situacion na WEB ta stabil. Un biaha mas gerencia ta gradici comunidad pa e comprension y ta gradici tur empleado envolvi di WEB y ELMAR pa e esfuersonan haci.