Companianan acuatico mester busca permiso na DSA

ORANJESTAD; Den cuadro di introduccion di e Beach Policy nobo Directie Scheepvaart Aruba (DSA) a saca un communicado di prensa informando tur compania acuatico cu a renoba nan permiso of cu a aplica pa un permiso acuatico a base di articulo 18 inciso 1 di e Ordenansa “Landbesluit Openbare Wateren en Stranden” y cual permiso a wordo aproba, pa pasa busca esaki na DSA. 

DSA kier a recorda tur compania cu no a busca nan permiso ainda pa pasa busca esaki mas pronto cu ta posibel. Na momento di busca e permiso, mester presenta cu un seguro valido pa 1 aña y un stampia di 25 florin pa asina por ricibi e permiso. Si presenta sin e documento nan aki, DSA no ta otorga e permiso. E ordenansa ta prescribi den articulo 19 cu e compania mester responsabilisa su mes pa medio di un seguro den caso cu e comete daño na tercer persona y/of pasahero y/of daño na propiedad di otro. 

DSA kier a informa cu entrante 1 augustus 2016, tur compania acuatico mester ta operando bou nan permiso nobo. Mester tuma bon nota cu opera sin un permiso valido a base di articulo 18 inciso 1 di e ordenansa tin como consecuencia detencion pa un periodo di 60 dia of un boet di e di dos categoria, esta 5000 florin. 

DSA su orario nan di oficina ta for di dialuna pa diabierna for di 7.30 di mainta pa 4.30 di atardi.