Cantidad di studiante pa Hulanda a aumenta mas cu 20%

ORANJESTAD - E cantidad di studiante pa Hulanda a aumenta mas cu 20%. Manera NoticiaCla.com a raporta caba, diasabra gobierno a despidi di 150 studiante bayendo Hulanda, un grupo di 60 cu a biaha mainta caba y tur biahando cu sentimentonan mixto.  Minister di Enseñansa Michelle Hooyboer-Winklaar a duna di conoce na aeropuerto despues di a caba di saluda y desea e studiantenan tur cos bon cu nan estudio na Madre Patria. Despues di a combersa cu e grupo di studiante, e mandatario ta convenci cu nan ta bon prepara, cu un enfoke riba nan logro final cu ta nan diploma y pa por regresa y forma un carera profesional na cas.

Cedric Ponson a sali pa Delft unda e lo studia "werktuigbouwkunde" na TU Delft. E mes a busca "online" pa tur informacion relaciona cu e estudio y no obstante ela evalua varios otro direccion, na final el a opta pa esun ey mes pasobra e tin hopi tecnica, locual el a gusta mas. E estudio lo ta di 3 aña pa logra e "Bachelor Degree" y despues 2 aña mas pa e "Master Degree".

Mallory Wever a conta cu e ta bayendo Tilburg pa studia na Fontys Hogeschool Pedagogiek, den e area di "Pedagogiek". E preparacionnan a bay bon, aunke el a admiti cu na final tabata bastante emocional, dor cu mester bay laga famianan atras, pero asina mes ta bay cu un meta y ta spera di finalisa e estudio completo den 4 aña di tempo. Su mama tabata un inspiracion p'e pa motibo cu tambe a studia den e mesun direccion mas o menos.

A nota un variedad grandi di estudionan y programanan cu e hobennan a scoge e aña aki. "Cu mas studiante ta scoge pa sigui studia, semper pa mi ta un bon señal. E ta mas un indicacion tambe cu enseñansa ta riba un bon rumbo, cu mas hende kier studia y mas hoben kier sigui studia den exterior pa por ta bon prepara pa forma un carera profesional den nan bida",  Hooyboer-Winklaar a termina bisando.