Elmar: Fayo Blackout tabata for di nan mannan

ORANJESTAD - E fayo di e blackout di diasabra ultimo na Aruba, tabata for di nan mannan, aunke asina mes nan a traha duro pa drecha e situacion mesora. Manera ta conoci, tabata pa mas o menos 8:10 am cu a drenta informacion na central di NV ELMAR cu barionan ta raporta fayo den suministro di coriente. No a dura mucho cu WEB Aruba NV a raporta cu ta trata aki di un problema serio y cu henter nan operacion a bay plat, conoci como un "Blackout". 

TRAHANDO DURO

Mesora a activa mas o menos 15 tecnico di NV ELMAR cu a bay na tur e substacionnan, pendiente pa asina WEB Aruba NV cuminsa suministra coriente, pa nan por distribui pa casnan y negoshinan. Mester menciona cu na cada substacion tabata distribui coriente segun WEB Aruba NV tabata pone mas capacidad disponibel.

CON LIHE A HAYA CORIENTE BEK

Tecniconan di NV ELMAR a raporta cu na e substacion na Sabana Blanco, nan a caba di suministra pa henter e area pa 11:05 am caba. Asina na Tanki Leendert a keda cla pa 11:12 am, na San Nicolas pa 11:37 am, na Palm Beach na 11:54 am, na Pos Abao pa 1:48 pm, na Paardenbaai pa 1:56 pm y e ultimo pa haya tabata e substacion di Balashi cu a reconecta tur cliente pa 2:15 pm.

DISCULPA DI ELMAR

NV ELMAR ta disculpa su mes na tur cliente pa e interupcion aki, aunke e fayo tabata for di nan mannan. Asina mes tecniconan a haci tur lo posibel pa por a reconecta coriente mas lihe posibel, consciente di e inconveniencia cu un "blackout" ta causa na henter nos comunidad. E ultimo situacion similar tabata dia 23 di october 2015.