WEB: Aruba completo tin coriente atrobe

ORANJESTAD - Den careda di 3'or di atardi, e suministracion di coriente tabata completamente normal atrobe. Vocero di WEB Asja Dongen a confirma na NoticiaCla.com cu pa e ora ey, "100% di Aruba tin coriente atrobe". E motibo di e fayo ainda no ta conoci pero ta spera cu dentro di poco por informa kico e motibo principal di e fayo aki tabata. E largura y e dia no tabata uno mucho apropia, y a genera basta critica den comunidad. Mester bisa si cu, contrario na e informacion inicial cu lo a dura entre 4 pa 6 ora pa coriente bolbe, a bay mas liher. Ya despues di un ora y mei, algun lugar a cuminsa haya coriente bek. Otronan a dura mas largo. No ta conoci kico a conduci e diferencia aki aunke ta conoci cu ora cu coriente bin bek, ta pa seccion ta lanta esaki bek poco poco. 

E BLACKOUT

Manera ta conoci, Aruba a lanta diasabra den un blackout total. Vocero di WEB Asja Dongen a confirma na NoticiaCla.com e momento ey cu cu por papia di un blackout total di Aruba, y cu e problema lo ta na WEB. "E ta un blackout total, y e tempo di recuperacion por ta entre 4-6 ora" Dongen a splica NoticiaCla.com.