DIP investigando si boramento na Seroe Colorado tabata legal

ORANJESTAD - Mientras cu tin derecho di opcion pa algun tereno na Seroe Colorado duna riba e 'klip', tin investigacionnan tumando lugar door di Directie Infrastructuur en Planning (DIP), si e boramento di prueba cu a tuma lugar na e sitio tabata haci cu permiso. Asina miembro di management team di DIP Isabel Dammers a bisa NoticiaCla.com diabierna mainta. "Asina leu cu mi sa na DIP no a wordo duna permiso pa esaki" Dammers a sigui bisa. Como tal DIP a tuma contacto cu director di DOW y infrateam di minister (Sevinger) pa confirma si tin permiso duna pa e proefboringnan. Si esey no ta e caso, nan lo tin cu stop trabou. Pasobra no por ta posibel cu proefboring ta wordo haci sin permiso", Dammers a bisa. 

PROCESO NORMAL

E proceso normal ta cu si tin necesidad pa haci e boramentonan di prueba, e tipo di trabou ta core cu permiso di DIP of DOW y sigur bou di supervision di DOW. E localidad di e terenonan exacto no por a wordo bisa na NoticiaCla.com. Loke si a bisa ta cu tin un 'onderverdeling na e 'klip' eynan y ta un par di kavel tin aloca pa desaroyo turistico. Dos sigur ta duna den opcion segun Dammers. 

MINISTER NO NA ALTURA

"Mi no ta na altura di ningun hotel na San Nicolas", tabata reaccion di minister di turismo Otmar Oduber durante un conferencia di prensa dialuna ultimo. "Pero si ta un hotel na San Nicolas, mi ta sostene 100%" e mandatario a sigui bisa. E ta haya straño si cu e no ta na altura siendo minister di turismo, pero ta sostene e proyecto. E no ta na altura di ken e proyecto ta, pero a sigura cu esaki no ta di Bahia Principe, manera cu a wordo bisa. Un raportahe for di e matutino Solo di Pueblo a bisa algun dia caba cu ta tereno otorga na famia Arends, y a te hasta bay asina leu di duna midinan di e tereno. Pero e mandatario a desmenti di sa algo di e proyecto aki. Foto cortesia Solo di Pueblo.