Corte a rechasa demanda Gerrick Croes contra 24ora.com

ORANJESTAD - Corte diabierna a dicta sentencia na fabor di e website 24ora.com, y contra e ex coordinador di fraccion di partido MEP Gerrick Croes. Croes a demanda e website pa un rectificacion di un articulo publica, divulga fuente pa e articulo, un multa, y un adelanto riba un pago di un aña di salario di Croes. E sentencia sinembargo, ta nifica cu ningun di e puntonan aki lo wordo otorga na Croes, y cu al contrario, e mester paga gastonan incuri di e caso. E caso ta subraya e funcionamento di prensa, su libertad, posibilidad y interpretacion di noticia, manera cu hues mes a describi den e sentencia amplio. 

E ARGUMENTONAN

Un di e unico puntonan cu hues a duna Croes rason tabata e hecho cu opta pa trata esaki via un caso sumario. Mientras cu enberdad Croes a tarda pa presenta e caso,  segun hues, no ta kita e urgencia y e tempo no a invalida e interes pa cu esaki. 

FUENTE Y INTERES PUBLICO

Un di e puntonan interesante tabata e pensamento di corte riba e asunto di divulga fuente di un storia, algo cu ta sagrado pa un periodista y su medio. Segun corte, proteccion di un fuente ta di vital importancia pa prensa, y como tal ta pisa hopi pisa den e caso aki. E ta un fundamento di libertad di prensa. Y ta solamente den caso di interes publico severo, por limita e derecho di proteccion di un fuente y su proteccion. De hecho, segun corte, Croes no por a demonstra durante e caso pakico mester a divulga e fuente y pues kita e proteccion di e fuente. Tambe corte a mustra cu no ta necesario pa un periodista of medio pidi comentario of opinion di e persona riba cual ta wordo skirbi. E por, pero no ta rekeri aunke den practica e ta algo comun si. "Por haci'e despues tambe", corte ta opina. 

POSICION PUBLICO

E loke a sosode cu Croes, for di e noticia di su envolvimento di malversacion, sea cu el a haci'e of no, enrikese su mes of no, sigur ta noticia den wowo di corte. Y mientras cu e relato en berdad tabata negativo pa imagen di Croes, corte ta mira cu esaki tabata di un efecto limita mirando cu Croes su comportacion mes a conduci na esaki. Pa loke ta e contenido di e articulo y su veracidad, Croes, den opinion di corte, no por a prueba cu esaki tabata completamente incorecto, y esaki ta pisa positivo den banda di 24ora.com. Analisando tur e puntonan, corte a rechasa e demanda di Croes y a dicta na fabor di e website 24ora.com. Croes tin 2 siman pa apela e sentencia aki. Por lesa e sentencia aki.