Deal Valero-gobierno tumando mas tempo cu a anticipa

ORANJESTAD - Negociacionan entre Valero y gobierno di Aruba ta tardando mas cu a kere. "Tin bon momentum den e talksnan, pero ta hopi detaye mester regel" tabata e comentario diahuebs di hefe di e team negoshador Richard Arends na NoticiaCla.com. Segun Arends, tur asunto di transision ta wordo atendi entre Valero y CiTGO, y entre Valero y Aruba (pa e mercado local). "Esey ta tumando mas tempo cu a anticipa", Arends a bisa den un comentario breve. Arends a sigura NoticiaCla.com cu ta cuestion di dia y no siman pa e deal aki keda cla. Mientras cu e detayenan fiscal ta uno, tin otro aspectonan cu tambe a tarda e proceso mas. NoticiaCla.com tin informacion cu un aspecto tambe ta e suma di impuesto cu Valero tin cu paga gobierno ainda. 

Manera ta conoci, e intencion tabata pa e reapertura di e refineria bou di bandera di CITGO tuma lugar dialuna awor, 1 di augustus. Pero tabata obvio cu esaki no por a logra y cu despues a pospone esaki pa 1 di september. Henter un luna mas despues. Esey ta pasobra mientras cu e deal entre CITGO y Aruba tabata cera caba, esun entre gobierno di Aruba y Valero y Valero y CITGO ainda no tabata cla. A premira cu esey lo a dura algun dia, pero a dura simanann largo sin cu por a keda cla. Cada bes tabata bisa cu falta algun dia, pero esaki a keda alarga. Cu e posponemento di e fecha di reapertura pa 1 september, partidonan a haya mas 'sosiego' y e presion tabata poco menos. Mientras cu tin un conferencia programa pa diabierna 3'or, e topico no a wordo menciona, y no ta descarta cu por haci e anuncio cu partidonan lo a haya otro, pero esaki no ta confirma.