Pullmantur ta bolbe inclui Aruba den itinerario na 2017

ORANJESTAD- Despues di a dicidi di cancela destinacionnan den area di Caribe, Pullmantur a anuncia cu nan ta bolbe Caribe y Aruba den e temporada abou. Pa A.T.A. esaki sigur ta refleho di esfuersonan exitoso pa nos isla cu lo conoce 25 ‘calls’ di e barco Zenith (un ekivalente di 35,280 pasahero) otro aña. E itenerario lo consisti di Aruba, Colon (Panama), Cartagena (Colombia), Corsou y Boneiro. Strategia di Pullmantur lo ta dirigi riba un clase cu esnan di mas entrada compara cu locual tabata bishita nos isla antes.

NEGOSACIONAN  INTENSO

Durante ultimo simannan un delegacion cu ta consisti di Aruba Tourism Authority (A.T.A.), Ministerio di Turismo di Aruba y Aruba Ports Authority den asociacion cu Curaçao y Panama a dialoga cu operadornan di e compania crucero Pullmantur y Royal Caribbean Cruise Lines tocante posibilidadnan di negoshi pa 2017/2018. Combersacionnan aki a resulta den negociacionan fructifero no solamente pa Aruba, sino tambe pa turismo crucero den e region Caribense, unda otro nan tambe a bin ta negocia cu Pullmantur.

TURISMO CRUCERO PROYECTA DI CRECE CU 5% OTRO AÑA  

Di e 250 ‘calls’ proyecta pa 2017, esakinan lo aumenta awor cu 275 ‘calls’ danki na Pullmantur su barco Zenith. Cu un total di 640.793 pasahero proyecta pa 2016, lo mira un crecemento di 5.5% den pasahero compara cu 2015. Mientras cu e proyeccion nobo pa 2017 ta di 672,938 pasahero cu lo representa un crecemento di 5%.