AMMF: Aruba no por pronkia cu mangrove eco resort sin tin proteccion di mangel

ORANJESTAD - “Isla di Aruba” no por pronk cu un “Mangrove ECO- Resort” na Isla di Oro y uza como atraccion “conservacion di Bosque di Mangelnan ”, si no tin proteccion di mangel  y un programa andando di rehabilitacion, conservacion y proteccion. Asina e organisacion Aruba Marine Mammal Foundation (AMMF) a declara den un comunicado.  Segun AMMF, relaciona cu un carta cu a leak pa prensa, di 4 NGO’s informando Gobierno di nan posicion relaciona cu e proyecto di Isla di Oro - Eco Resort,  di cual Aruba Marine Mammal Foundation (AMMF) ta co-firmante, AMMF a duna e declaracion menciona. 

PRE CONDICION

AMMF a pone varios condicion  “pre-evaluacion di posibilidad”  di un eco resort na Isla di Oro na Gobierno, cu mester a cuminsa wordo ehecuta for di e tempo ey caba. For di 2013 te cu awor, ta reduccion y destruccion di Mangelnan nacional so Aruba a experiencia, p.e. Bubali Plas, dump, brug adicional na Spaans Lagoen (zona protehi pa Ramsar Convention) y nada a wordo haci pa pasa legislacion cardinal di proteccion y pa establece un programma activo di maneho di conservacion. Riba dje awor Gobierno ta bay atenta cambia ROP pa por pone mas proyecto den Aruba su bosquenan di Mangel. Kiermen nan intencion ta contrario di loke ta un berdadero programa di conservacion y ta bau liña recta contra AMMF su condicion bou cual por bay sinta evalua un Isla di Oro Resort.  

RECOMENDACIONAN ENTREGA

Na luna di mei di aña 2013, riba peticion di Ministerio di Turismo, Aruba Marine Mammal Foundation  y otro NGO-nan a traha y entrega recomendacionnan na Gobierno.  

AMMF a entrega e sigiente puntonan:   

1) Lista di 4 motibo cu un eco resort na Isla di Oro lo ta bon pa Aruba.  2) Un lista di splicacion KICO ta significa un Eco-Resort.  3) Un lista di 16 puntonan cu e desaroyador mester cumpli cu ne pa e hotel ta considera un ECO- Resort. 4) Un lista di puntonan specifico den un plan di maneho di conservacion pa e desaroyadornan duna clarificacion; pa duna AMMF oportunidad di evalua e proyecto y duna opinion (objeccion of sosten). 5) Un lista di 7 punto cu Gobierno di Aruba tin cu cumpli cu ne PROME cu nan por ta den posicion di evalua si ta duna un permiso of no pa e Eco-Resort na Isla di Oro. 

PUNTONAN CARDINAL

Un di e 7 puntonan cardinal di numeroso criterio di AMMF pa Gobierno di Aruba, ta cu mester implementa legislacion pa TUR  zona di mangroven ta un sanctuario protehi, y ehecucion di un bon programa di maneho di conservacion cu ta andando algun tempo, prome cu por sinta evalua riba posibilidad pa un Eco-Resort na Isla di Oro. 

DESAROYO BRUG ADICIONAL

Pero a bin desaroyo di un BRUG adicional na Spaans Lagoen, un herida permanente di e ecosystema aki cu no por wordo scondi. Aki a scoge pa agrega y pronk cu un brug grandi moderno y aumenta trafico den e zona, cual ta significa destruccion parcial y desturbio di e ecosistema di Bosque di Mangel en bes di pronk cu proteccion di dje y pone un  “Green corridor” PAFOR di  e  teritorio  “real green” aki.  

DUMP y su sitio “meymey“ di  un Bosque di Mangel,  situa banda di runway di aeropuerto, ta SIGUI wordo ignora, mientras cu e ta keda tambe e prome y ultimo vista di destruccion massal di mangroven cu e “ECO turista”  ta mira ora di subi y baha cu avion na Aruba. Si esaki no disparce, no por trece Eco-Turismo usando proteccion di mangroven como atraccion. Desaroyo  nobo hotelero ta sigui causa reduccion di e habitat di Biodiversidad na BUBALI PLAS y den medio di prensa a laga sa cu ta planea pa saca Bubali Plas for di “groen gebied” pa sigui reduci e zona natural aki.

AMMF ta para riba cu Isla di Aruba mester stop cu reduccion y destruccion di Mangelnan, y implementa proteccion legislativo y ehecutivo VERIDICO, y coregi e sitio di Dump, PROME cu por evalua si ta posibel pa bin cu un Isla di Oro Eco-Resort pa show case con Aruba ta “proteha Mangroven”. 

Den AMMF su opinion esaki ta simpel common sense, y e deseo pa haci tal mester bin for di nos cuna den alma pa haci cosnan bon y corecto. No mester warda pa wordo enforsa via ley y corte.  Gobierno den su totalidad tin cu cambia nan atencion y intencion tocante nos naturalesa, cu urgencia.  Naturalesa tin limite. Isla di Aruba tin cu kita su pia di e pedal hambra pa progreso comercial cu ta sacrifica biodiversidad, y no cay den e trampa di alabacion di proyecto, cu alo largo ta empeora e problema cu su consequencianan malo pa nos mes.