ATIA ta anuncia di 5 edicion “Women In Leadership Conference”

ORANJESTAD –  ATIA conhuntamente cu Aruba Bank y Setar NV a anuncia e di 5 edicion di e “Women In Leadership Conference” cu lo tuma luga dia 26 di augustus proximo na Marriott Resort & Stelaris Casino. Kimberly Boekhoudt, directora interino di ATIA a revela e tema principal di e aña aki, esta, “Building Female Role Models”, pues e participantenan lo reflexiona riba nan mes un rol di leader como tambe con esaki ta influencia e futuro leadernan femenino riba nos isla.

Segun Sra. Boehoudt di ATIA e organisacion ta premira cu e di 5 edicion di ‘Women In Leadership” lo bira uno sumamente interesante y educativo. “E conferencia e aña aki lo concentra riba e importancia pa inverti den e desaroyo di leadership skills y networking”, asina e directora interno di ATIA a informa. Ademas tambe lo amplia riba con por suavisa e variedad di obstaculo cu hende muhenan ainda ta enfrenta den nan carera profesional awendia. 

Despues di cuatro conferencia sumamente exitoso a keda comproba cu e interes y deseo di nos hende muhenan cu kier logra yega na e top di exito den nan carera profesional, ya sea riba tereno corporativo, politico of como ‘entrepreneur’ tur aña a manifesta su mes mas fuerte durante e conferencia aki. E biaha aki lo haci enfasis tambe riba e topico di “role models” y e importancia pa nan trece cambio positivo den liderazgo femenino.

Pa cuatro aña caba ATIA a sa di motiva nos hende muhenan pa nan logra nan metanan tanto den nan bida personal como profesionalmente mediante e conferencia di ‘Women In Leadership’ y e aña aki e oradornan invita, esta , Mrs. Gina Harden, Mrs. Kelly Hoey, Mrs. Nathaly Cabrera y Mrs. Michele Brooks lo brinda e hermentnan necesario pa logra esaki y tambe pa aporta na e futuro generacion di muhenan lider riba Aruba.