Dia 1 di augustus ta aplica ley di cuido di nos grandinan

ORANJESTAD - Dia 1 di augustus oficialmente ta cuminsa aplica e ley di cuido di nos grandinan. E ley aki ta delinea e rekisitonan y normanan minimo cu tur instancia cu ta cuida hende grandi na Aruba mester cumpli cu ne. Lo tin un periodo di transicion y pa aña 2017, cu e introduccion oficial di e departamento di Inspeccion, lo cuminsa controla tur instancia di cuido hende grandi, sea ta fundacion of instancianan priva tambe. E mandatario di salud Alex Schwengle a agrega cu tur e rekisitonan y normanan ta parti di e ley “Landsverordening Zorginstellingen”, cu a haya su contenido cu colaboracion intensivo y contribucion for di e “veld”.

Schwengle  a splica cu e ley no ta bin su so, pero ta conta cu e sistema di sosten, esta e “Plataforma pa Nos Grandinan” y e seccion nobo di Departamento di Salud Publico cu ta conoci como “Afdeling Ouderenzorg”.Despa su Seccion di Cuido pa nos Grandinan esta e asina yama “ Afdeling Ouderenzorg” ta duna e sosten na e instancianan di cuido pa nan yega na cumpli cu tur e rekisitonan minimo estableci. E intencion no ta pa critica y straf e instancianan, pero pa guia y yuda nan yega na y sigui cumpli cu e standard minimo obligatorio. Esaki Minister Schwengle a subraya tambe.

Loke kier yega na dje ta cu tur instancia, incluyendo SABA, otro fundacionnan y e instancianan priva traha na e forma corecto y cumpli cu e calidad minimo den tur area pa provee un cuido di calidad y adecua pa hendenan grandi na Aruba.Lo tin lesnan y sesionnan di guia y informacion pa siña tur instancia con pa yega y mantene nan institucion na e nivel di calidad stipula den e ley.

Schwengle a splica cu un di e promotornan mas grandi di e ley aki ta Stichting Wit Gele Kruis, como cu nan tabata mira e necesidad pa instancianan priva yega un nivel di capacidad y calidad minimo pa garantisa e miho calidad di cuido pa nos grandinan. Na diferente di e centronan aki por a wak cu e calidad no tabata suficientemente bon.

E casnan particular ta un bon iniciativa cu ta yuda den e necesidad pa mas capacidad, esta e cantidad di cupo y tambe ta diversifica e mercado den cuido di hende grandi. Minister Schwengle ta di opinion cu nan ta yuda, hunto cu Wit Gele Kruis y SABA pa trece un balans y cubri e necesidad y si famianan ta dispuesto pa paga nan mes pa e cuido di nan grandinan, nan mester por haci esaki tambe, pero na fin di dia e cuido mester tuma luga na e forma corecto.Tur instancia ta haya e guia y tempo suficiente pa yega na e normanan di calidad minimo prome cu Inspeccion cuminsa funciona y ta drenta pa controla nan.

Schwengle a bisa cu e “golden standard” ta keda Hulanda, pero nan ta realisa tambe cu tin cosnan cu ta posibel na Hulanda cu no lo ta posibel na Aruba, y p’esey ta bin cu standard  y definicionnan local. Entre e topiconan cu lo wordo cubri den e ley ta kico mester pa e persona ta comodo y bon cuida, kico ta e espacio minimo necesario, cuminda, bebida y siguridad, tanto literalmente como siguridad fisico, y siguridad pa cu remedinan.