Gobierno a ricibi Melanie Wever na aeropuerto

ORANJESTAD – Dialuna ultimo Prome Minister Mike Eman a ricibi e hoben Melanie Wever na Aeropuerto International Reina Beatrix pa felicit’e y honr’e cu su titulo di Campeon Mundial Hubenil den categoria Amazona di 15 pa 17 aña. Esaki a tuma luga dianan 23 y 24 di juli ultimo na Puerto Rico. Rondona pa famia y amigonan cu tambe a bin duna Melanie un bon bini caluroso, Premier Eman a expresa: “Pabien Melanie  den nomber di Aruba nos ta masha orguyoso di bo.”

Melanie ta entre e hobennan cu e programa ‘Hoben y Talentoso’ dirigi pa Minister President Eman a resalta como e talentonan di nos isla y ehempel pa otronan. Melanie a traha duro y asina a logra di bin, pa di 3 aña consecutivo, cu e titulo maximo na e campeonato mundial. Igor Kock, kende ta su entrenador, a duna di conoce cu manera nan a yega Puerto Rico, nan a sinti con tur hende tabata papia di Melanie so.

E logro aki  ta uno grandi pa e hoben, pa su famia, pero sigur tambe pa Aruba como isla cu, pa medio di hobennan ehemplar manera Melanie, ta resalta den diferente tereno. Prome Minister Mike Eman ta gradici Melanie pa su prestacion, e ehempel cu e ta duna na otronan y pa mustra loke Aruba tin den talento mey mey di nos hubentud.