Empresarionan kier gobierno revela contractnan pa para discusion

ORANJESTAD - Uzando e landsverordening Openbaarheid van Bestuur (LOB) cu ta duna un ciudadano e derecho di pidi gobierno documentonan publico, tanto propietario di e emisora Power 101.7FM, Ralph Maduro como periodista Nelson "Speed" Andrade a pidi gobierno pa nan haya un serie di documento pa wak. Ta trata di documentonan cu mester revela detaye di contractonan cu gobierno a cera cu e respectivo personanan referente varios negoshi. E intencion di ambos ta, pa trece claridad riba ken tur tin contract riba kico, y pa comunidad haya sa e berdad y pa stop e bay bin di lastramento di otro den medio. 

LASTRAMENTO CONTRA OTRO

Pa algun tempo caba tin un bay bin indirectamente entre e dos personanan aki, unda cu ta acusa otro di ta enrikesendo nan mes via contractonan miyonario, y cu lo ta scondiendo tras di diferente compania pa beneficio propio. E cos a cuminsa ora cu den un intento pa mustra cu un minister di e gabinete aki, Otmar Oduber, lo no ta actuando corecto y ta uzando amigonan (entre nan esun principal Ralph Maduro) pa front su negoshinan y asina enrikece su mes y e amigo, Andrade tabata uza nomber di Maduro publicamente pa mustra su punto cada bes. Maduro (cu ya a reacciona na un ocasion caba) a dicidi pa reacciona e siman aki cerca NoticiaCla.com y mustra cu e ta cansa di esaki. Como tal e ta splica pakico a dicidi di tuma paso den forma di pidi documentonan cu mester divulga ken tin contracto cu ken y pa kico y pa cuanto, y pa asina pone un paro riba henter e 'novela publico' aki. "Mi a cansa. Bo no por keda ligami cada bes y bin cu insinuacion sin cu bo tin base pa nan" Maduro a bisa. Via un carta pa cada minister cu lo tin contracto cu e.o. Andrade, y su socio Patrick Paskel, y ta haci mencion tambe di Mark Benson (Denz), Maduro a pidi tur e ministronan concerni pa divulga e contractonan. Esaki ta nifica cu por lo menos 8 minister a haya un carta asina, cu e tempo di 3 siman (segun e ley ta stipula), pa contesta Maduro riba su preguntanan. " Nan (Maduro referi na e nombernan menciona ariba) ta bisa cu nan no ta biba di dje, pero ora mi wak contractnan di 22 mil florin pa luna, cu e companianan ta cobra, y mayoria di e companianan ta haci mesun trabou, no mas cu nan tin diferente doño" Maduro ta bisa. Loke cu Maduro kier tene limpi den e caso aki, ta su credibilidad. Segun Maduro, e grupo aki di periodista kier manipula informacion y pretende cu tur cos ta bon, pa nan por proteha nan entrada halto cu nan ta genera di gobierno.  

NELSON ANDRADE

Mientrastanto NoticiaCla.com a pone man riba e carta cu Andrade a manda pa un minister pidiendo e pa tur e contractonan cu tin entre su persona (Otmar Oduber), y Ralph Maduro. Andrade den su caso, kier pa Oduber revela tur contracto desde 2009 cu tin cu Maduro su companianan, y tambe inclusive, produci e rapport di PWC riba All Inclusive. Aki tambe a pidi pa 3 siman di tempo pa e minister reacciona, cu ta e tempo cu ley ta duna. NoticiaCla.com a pidi Andrade pa un reaccion riba e tema. 

REACCION PATRICK PASKEL

NoticiaCla.com a tuma contacto tambe cu Patrick Paskel, cu tambe ta wordo menciona den e caso aki. Mientras cu Paskel no kier a bay den detayes di e contractnan, el a duna un reaccion breve. "Mi no ta discuti asuntonan priva di negoshi den media. Nos ta un compania cu, estableci desde aña 2000 y tin un variedad di clientenan cu ta varia entre companianan di utilidad, salubridad, bancario, hotel, seguro, turismo, agencia di auto, fastfood, husticia y mas" Paskel a cuminsa na bisa. "Tin un motibo dicon nos clientenan ta opta pa traha cu nos, un ekipo dinamico di profesionalnan hoben cu ta traha 24/7 pa nos clientenan" e propietario di Tera Group a sigui bisa. Riba specificamente e parti di contract cu gobierno e tabatin e siguiente contesta:"Gobierno ta 1 cliente di nos. Nos ta sirbi Ministerio di Salud y Enseñansa pa 7 aña caba y algun departamento di Gobierno mas" Paskel a finalisa bisando. Mark Benson Denz no a reacciona, pero a bisa di a tuma nota di cierto declaracionan haci di Maduro, aunke no a tende personalmente pa e duna comentario ariba (ainda). Scucha e entrevista cu Ralph Maduro aki.