700 mil ton di metal pa arma brug nobo di Spaans Lagoen

ORANJESTAD – Un parti importante di Green Corridor, caretera di dobel via di e area for di aeropuerto te cu San Nicolas, ta e brug nobo na Spaans Lagoen. Tur e piezanan lo wordo traha na Colombia y treci Aruba unda cu e brug lo wordo arma. 

PROME SET DI PIESA

E prome set di piesanan pa e base di e brug a yega Aruba pa cual tin un team special trahando, construyendo e fundeshi y otro trabounan relaciona cu ensamblahe di e brug.  Carlos Zubieta, director di e proyecto pa e compania Caribbean Infrastructure Company cu ta ehecutando e trabounan di Green Corridor, a splica cu nan ta trahando awo riba e fundeshi di e brug emblematico di structura metalico, cual lo mester soporta tur cos, manera peso di vehiculonan pisa, horcan, y temblor. No menos cu 700 mil ton di material metalico lo wordo importa den fase pa ensamblahe di e brug.

TELEFERICO 

Pa haci e trabou mas facil di transporte di material di un banda pa otro, CIC ta construi algo den estilo di un teleferico (40 pa 45 meter halto) , via cual e carganan ta wordo transporta pa otro banda, evitando di e forma aki menos daño posibel na e lagoen. Ing. Jossy Kock (Funcionario di DOW encarga cu e proyecto)  a splica cu na momento di construi un brug por a haci uzo di diferente ekipo manera “crane”, pero a dicidi cu lo no uza e sistema tradicional y a scoge pa un sistema internacional cu ta special pa zonanan vulnerabel. E trabounan aki mester finalisa pa november awor y e momento ey e teleferico ta wordo desarma y mester laga e sitio den su estado original. 

E trabou ta bay wordo haci di tal forma cu e lo stroba minimalmente e fluho di trafico den bisindario, debi cu e obra ta wordo realisa na banda di e caminda cu ta wordo uza aworaki.  “Practicamente lo no tin interferencia den e trafico normal,” Zubieta a bisa. E brug lo tin un largura di 90 meter y 35 meter halto.