Stichting Balansa Nobo mester sera su portanan

ORANJESTAD – Stichting Balansa nobo ta sera su porta fin di siman aki despues di 5 anja di existencia. Motibo ta falta di placa debi cu gobierno no kier sigui subsidia e fundacion.. Durante e ultimo 4 añanan, Balansa Nobo a duna guia financiero na mas cu 450 famia. Aunke e fundacion ta duna un servicio necesario, a cumpli cu tur rekisito di gobierno y a hasta presenta diferente scenario financiero pa sobrebibi, nan ta bisa cu Gobierno di Aruba no a compromete su mes pa sigui subsidia e fundacion.

Na comienso di e proyecto, Gobierno di Aruba a garantisa financiamento pa tres aña. E idea tabata pa Balansa Nobo por genera entrada pa su servicio. Despues di e prome tres aña a realisa cu e meta aki no ta realistico. Pesey na 2012 Gobierno di Aruba a sigui subsidia e fundacion y a duna impresion di sigui cu esaki den futuro tambe. Na comienso di 2014, Gobierno di Aruba a informa cu e subsidio di Balansa Nobo no ta presupuesta pa 2014 pero cu ta buscando un solucion. Tambe a pidi Balansa Nobo pa haci mas esfuerzo pa crea su mesun entrada. Remarcabel ta cu desde comienso di su servicio, Balansa Nobo a trata di yega na entrada, entre otro tambe pa crea un areglo cu Aruba Bankers Association. Asina e banconan commercial cuminsa duna aporte. Lamentablemente esaki no a sosode y te ainda e creditornan di Aruba no ta contribuyendo na e solucion di un problema cu nan mes ta causando pa un parti.

CEDE Aruba como fondo social y partner den e proyecto aki, a haci tur cos posibel pa intermedia den e situacion aki. A reuni cu Minister di Asunto Social, Departamento di Asunto Social y a hasta haya fondonan di Hulanda disponibel pa yuda temporalmente. Mientrastanto Balansa Nobo a crea diferente scenario financiero, entre otro baha gasto operacional y traha cu menos trahador. Na final esaki no a resulta, mirando cu Gobierno di Aruba no a duna ningun garantia pa subsidia e fundacion na termino largo. CEDE Aruba ta lamenta cu un servicio asina importante pa comunidad ta bai sera porta. Awor tur cos ta den man di Gobierno, aunke cu situacion aki por a wordo evita. Desde 15 di augustus 2014 tur cliente lo mester bai bek na Departamento di Asunto Social, cual no tin e infrastructura tecnico y e experticio pa anda cu e problematica aki. CEDE Aruba ta spera cu Gobierno lo asumi su responsabilidad pa preveni y combati e problema di debe den nos comunidad.

Stichting Balansa Nobo a wordo funda na 2009 y tabata un iniciativa di Departamento di Asunto Social. E meta di e Balansa Nobo tey pa yuda famianan cu debenan problematico na un solucion. E fundacion a lanta mirando cu e problema di debe priva na Aruba a crece y ta rekeri un conocemento hopi special pa duna ayudo na e problematica aki. Balansa Nobo a wordo financia den un cooperacion entre Gobierno di Aruba, CEDE Aruba y Samenwerkende Fondsen Caribisch Deel van het Koninkrijk.