Pelotero Arubano di Baltimore Orioles suspendi pa uzo di substancia prohibi

STO DOMINGO - E pitcher Arubano hungando pa e liga menor di Baltimore Orioles, Wally Vrolijk (21), a ricibi un suspecion di 50 wega pasobra el a test positivo pa un stimulante prohibi, conoci como  Methylhexanamine,  segun un periodista cu ta raporta pa e ekipo a raporta. Vrolijk cu apenas un aña pasa a firma cu Los Angeles Dodgers, y awor ta milita cu Orioles lo mas sigur perde e resto di e temporada aki debi na e suspension. Un aña pasa ainda NoticiaCla.com a raporta riba su bishita cerca prome minister Eman ora cu el a caba firma. Vrolijk mientrastanto a splica e caso riba su pagina di facebook, y a pidi tur hende pa prome cu husga, lesa y educa kico exactamente a sosode. 

DI DODGERS PA BALTIMORE

Den 10 wega e aña aki, Vrolijk su record tabata 2-2 cu un ERA di 3.05 den 20.2 inning di trabou, den cual e no a permiti ningun homerun. No obstante e ERA abou, ela duna mas di 16 base por bola.  Manera raporta, Vrolijk tabata miembro di e Los Angeles Dodgers Dominican Summer League team apenas un aña pasa (ora cu a caba firm'e) cu un record di 1-2 cu un ERA di 6.04 den 18 presentacion for di bullpen.  

FUTURO DI VROLIJK

Mientras cu Vrolijk no tabata prospecto cla pa subi pa liga mayor pa e team number uno awor Baltimore Orioles, cu e influx di hungadornan 'Hulandes', Orioles tabata mustra dispuesto pa tuma un chens cu e pitcher cu a perde facilmente den e grupo competitivo di liga menor di Dodgers. Si Baltimore ta bay keda cu Vrolijk of no unabes e suspension termina, tin cu wordo mira ainda segun e periodista cu a raporta e storia aki. Vrolijk ta e di 6 pelotero di Aruba cu ta milita den baseball Mericano, di cual Xander Bogaerts actualmente ta esun mas halto y exitoso. 

REACCION DI VROLIJK

Vrolijk mientrastanto a reacciona riba su pagina di FACEBOOK, splicando kico a sosode. "Mi ta un guy cu ta traha hopi duro y ta profesional" Vrolijk ta cuminsa bisa. "Mi no a sali positivo pasobra mi a injecta algo of mi a usa algo concientemente" e ta sigui bisa. Segun Vrolijk, el a uza un bebida energetico cu e no tabata sa cu tabata contene cafeina cu ta prohibi. "Awor mi mester paga un prijs di 50 wega suspendi" Vrolijk ta bisa den un video di casi 2 minuut, unda cu ta e duna mas splicacion. 

E SUSTANCIA PROHIBI

Pa loke ta e sustancia stimulante, e ta wordo uza como un suplemento dietetico of un producto pa boost bo energia. Pero tabatin por lo menos 5 morto raporta relaciona cu uzo di e producto aki, desde su reintroduccion riba mercado na 2006. E ta un producto prohibi pa uzo pa Baseball Mericano.