Retraso pa peticion na DIMAS t'ey berdad, pero no grandi

ORANJESTAD - En berdad tin retraso chikito den peticion pa permiso na DIMAS, pero tur ta den margen di ley pues no por berdaderamente considera nan 'retraso' . Asina director di e departamento, Kathy Ruiz Paskel ta contesta NoticiaCla.com abase di preocupacionnan presenta recientemente pa un parlamentario di e fraccion berde, Melvin Tromp. E parlamentario a vocifera su preocupacion riba esaki y dos otro tema, entre nan posibel rechaso di permiso for di oficina di minister mes y exclusion di e director adhunto for di reunionan importante. Tur a keda atendi pa e director di DIMAS.  

RETRASO CU PERMISO

Ruiz ta admiti cu tin un retraso relativamente chikito den tramite di su permisonan. Pero "gran mayoria di e peticionnan ta ser tramite dentro di e termino maximo cu ta stipula pa ley". Ademas, Ruiz ta splica, DIMAS tin - segun ley di admision - un termino di 12 siman pa atende y contesta un peticion entrega pa cu e meta pa obtene un titulo di estadia. E termino aki - segun ley -  por wordo extendi un biaha pa DIMAS, cu adicional 12 siman mas. Pues en total DIMAS tin un termino di maximo 24 siman (=12 +12) pa atende cu un peticion entrega.  Y e clientenan ta ser informa tambe di esaki ora di somete un aplicacion na DIMAS. Ruiz a sigui duna un bista detaya cu cifras riba e proceso di ultimo añanan. 

PETICION CU DIMAS TA RECHASA FOR DI OFICINA DI MINISTER

Un di e kehonan di Tromp, tabata indicacion cu peticionan aunke biniendo di oficina di minister mes, tabata wordo rechasa. Aki Ruiz a splica cu "tur peticion pa bin na remarca pa un permiso ta ser entrega na oficina di DIMAS. Cada peticion mester tin su documentonan, pa asina DIMAS por acept'e y haci un evaluacion completo y yega na un conclusion si e peticion en cuestion - considerando e cuadro di e ley y maneho - ta of no ta cualifica pa ser honra". Specificamente riba e hecho cu por ta 'rechasando' peticionan for di oficina di minister, Ruiz a mustra cu den caso cu ta consta cu e minister a tuma un decision cu ta posiblemente contra di leynan, lo DIMAS lo procede pa conseha e Minister pa desisti di su desicion previamente tuma. " Unda DIMAS observa cu un desviacion di propio maneho por tin repercucion pa e consistencia den e maneho hiba, lo atende esaki tambe den forma di conseho y den consulta di trabou cu e (oficina di e) mandatario". Ademas e ta duna un splicacion mas amplio riba e proceso aki. 

LAGA DIRECTOR INTERINO FOR DI REUNIONAN INTERNO

Riba e posibel exclusion of no di un director interino, Ruiz mesora a coregi esaki indicando cu ' DIMAS no tin of conoce actualmente un director interino'. " Si tin un posicion di director adhunto. (Adjunct Directeur)" Ruiz ta sigui bisa. " E proceso pa e formalisacion di e nombracion di un director adhunto (Adjunct Directeur) ta canando su trayecto.  E funcion di adjunct directeur ta un funcion cu ta ser considera como un “vertrouwensfunctie” y como tal mester ser gescreen pa VDA promer cu e por ser formalisa" Ruiz a sigui bisa. Pero pa loke ta exclusion di un hefe, manera cu Tromp lo ta insinua, no ta e caso. "No, no ta exclui ningun hefe di e departamento for di reunionnan interno. Sr Mario Wever - kende conseho di Minister a apunta como Adjunct Directeur - ta forma parti di e reunionnan di staf di DIMAS" e hefe di DIMAS a finalisa bisando.