Medaya di brons pa Aruba den Copa Internacional Simon Bolivar Karate Do 2016

ORANJESTAD - Diahuebs 14 di juli 2016 un grupo di karateka, esta Nelson Eduardo Quijada Romero, Robert Silva, Lucio Gonzalez Lujan, George Carraha, Catherine Carraha, Cristopher Carraha y Alejandro Gonzalez Lujan, miembro di e famia di Tamashi Shotokan Karate-Do Aruba a biaha pa Valencia, Venezuela pa participa na diferente seminario. 

E seminario mes a wordo organisa door di e instructor ‘Sensei’ Marvin Silva (5 dan) di Tamashi Venezuela. Cada karateka a participa na diferente training cu un actitud activo y un mente positivo. Despues di e seminario, a tuma luga -riba dianan 22 pa 24 di juli 2016-  e campeonato Copa Internacional Simon Bolivar Karate Do 2016 na Caracas, Venezuela den e gymnasium ‘José Beracasa’  di e ‘Parque Naciones Unidas del estado Miranda’. E campeonato aki ta wordo organisa anualmente door di e Federacion Venezolana Karate Do, unda atletanan di nivel halto ta topa, entre otro campeonnan centroamericano, suramericano y panamericano. E Copa Internacional Simon Bolivar Karate Do 2016 ta conoci como e evento subcampeon di mundo. E aña aki a participa 58 organisacion (tanto local como internacional) y 1100 karateka. 

Pa e team di Aruba e campeonato tabata uno exitoso. E karatekanan Nelson Eduardo Quijada Romero, Robert Silva, Lucio Gonzalez Lujan, George Carraha, Catherine Carraha, Cristopher Carraha y Alejandro Gonzalez Lujan a participa cu hopi animo y energia. Nan a siña hopi. E experiencia ta uno inolvidabel. Na final, tabata e karateka Robert Silva cu a destaca cu medaya di brons pa Aruba. Diadomingo 24 di juli ultimo, e grupo di karateka aki a yega bek Aruba. Nan a compromete nan mes pa sigui traha duro y pronto bolbe representa Aruba.