Alumnonan di Mon Plaisir Kleuter no tin scol diahuebs

ORANJESTAD – Debi na trabounan pendiente, Mon Plaisir Kleuterschool no por habri diahuebs manera tabata e intencion. Un email (lesa e email aki) di e scol pa tur e mayornan envolvi, a participa e informacion ey diaranson merdia. Segun e cabesante di e scol Roy Keuler, tin hopi trabounan cu mester a tuma lugar den un corto tempo, cu a pone cu nan no ta cla ainda pa habri e scol. Como tal mester a dicidi pa no habri e scol manera planea. “Nos a traha hopi duro, y tabatin consulta continuo cu varios instancia gubernamental” Keulers ta sigui relata. Mes momento e ta splica cu a logra hopi caba. “Mayan boso lo haya un update via mail” e cabesante ta sigui informa e mayornan. Esaki pasobra ta papia na prome instante di un dia cu e scol lo ta sera, pero e por extende pa diabierna tambe. No ta conoci cua scol mas ta den un situacion similar. Pero NoticiaCla.com a compronde cu tin mas scol cu lo tin problema pa habri. A haci intento pa comunica cu e instancianan concerni, pero a haya como contesta cu e informacion ey ainda no ta disponibel.