Oduber: Un periodista no por papia riba destino di un minister

ORANJESTAD - Den un intento pa desmenti rumornan persistente den fin di siman di posibel desacuerdo entre minister y un lantamento di partido nobo, e mandatario cu ta wordo referi na dje, Otmar Oduber, a desmenti tur esaki. "Si tin hendenan pafo di e gabinete ta kere cu nan por papia na nomber di gobierno, mester papia cu e periodistanan cu ta skirbi e articulonan ey" Oduber a bisa, refiriendo na periodista Speed Andrade cu a pone esaki den fin di siman riba tanto website como su pagina di facebook. Den fin di siman atrobe tabatin un bay bin di atake riba e tema di Oduber. 

INSTIGA PA PERIODISTA PARTIDISTA

"Mi ta lag'e pa loke e ta" Oduber a bisa. Riba e hecho cu supuestamente e relacion entre ministernan no ta manera cu e mester ta, Oduber a mustra den un forma diplomatico, cu ningun caminda den ningun famia no tin problema y of diferencia di opinion. "Diferencia di opinion sigur tin manera tur gobierno. Pero bo mester ta madura pa duna tur espacio pa por discuti (e problemanan)" Oduber a bisa. El a mustra tambe cu e no ta laga su mes wordo guia pa un periodista, cu su unico meta ta crea desunion pa motibo di interesnan personal. Ela referi tambe riba e post cu ela pone riba su pagina di Facebook, cu ta bisa cu e no ta laga su mes wordo instiga pa ningun hende. 

PARTIDO NOBO

Ora cu a confronta e mandatario cu rumornan riba un partido nobo, e mandatario a mustra cu e no a bisa nada riba e.o. facebook, ni minister president a bisa algo al respecto. El a desmenti tambe cu su amigo Ralph Maduro lo ta fungiendo como su lider di campaña. Ademas tambe a desmenti riba e asunto di color.