Nada riba all inclusive durante reunion entre minister y AHATA

ORANJESTAD - Mientras cu reunion a tuma lugar diabierna ultimo entre minister di turismo Otmar Oduber y CEO di AHATA riba tema di seguridad, ningun palabra a wordo intercambia riba e tereno di all inclusive. "Nada", tabata e comentario di e mandatario responsabel pa turismo na NoticiaCla.com den fin di siman. A puntra e mandatario esey mirando cu esaki ta e prome reunion entre nan dos desde cu e problema a cuminsa entre AHATA y gobierno riba e topico aki.  E motibo cu no a papia riba e topico aki, no ta pasobra e mandatario no por y kier, sino pasobra segun e mandatario, nan (AHATA) no mag di papia. Como tal e problema entre gobierno y AHATA ta keda persisti. E mandatario a sigura cu den curso di dialuna, e lo duna mas informacion riba e tema aki. No obstante e ambiente di 'hostilidad' entre e dos partidonan, nan a sa di smile pa camara y saca potretnan positivo. Pero esey tabata puramente basa riba e resutlado di e reunion riba seguridad den e aspecto hotelero. Loke si a wordo papia, ta e asunto di e impasse riba e asunto di board unda cu AHATA a retira su 3 miembronan di e directiva algun siman pasa. A priminti cu e siman aki e nombernan nobo lo wordo manda. "Mi ta contento cu sano huicio a prevalece", e mandatario a bisa.