Parlamento lo dicidi si BBO ta bira 2.5% of keda 1.5%

ORANJESTAD – Parlamento di Aruba lo dicidi si BBO ta bira 2.5% of si ta mantene e BBO actual di 1.5% separa for di e 1% bestemmingsbelasting. E bestemmings belasting tin cu drenta na vigor dia 1 di september proximo. Asina minister di economia Mike de Meza a confirma na NoticiaCla.com diaranson. Mes momento e mandatario a duna su clarificacion riba e asunto di e parti di gobierno, conoci como ‘landsbijdrage’ na e post di AZV. E pregunta a surgi, ki garantia pueblo tin cu defacto e suma di 1% ta wordo uza exclusivamente pa cubri AZV y cu e no ta wordo uza den otro cos, cu e chens cu gobierno ta uza esaki pa reduci e landsbijdrage, tirando mas peso riba e pueblo.

Segun de Meza, e formula pa ley pa yega na e landsbijdrage di gobierno pa AZV ta basta simpel. Kitando e entrada cu AZV ta haya for di e gastonan, ta keda e suma restante. E suma ey ta bira e landsbijdrage cu gobierno pa ley tin cu contribui cune. Loke lo sosode awor, ta cu banda di e prima di entrada di AZV, ta bin acerca e bestemmings belasting di 1%. Como tal e suma di landsbijdrage ta wordo adapta consecuentemente na e suma cu resta. Mes momento de Meza ta splica cu e suma nunca ta uno cu ta fiho, sino ta depende totalmente di e entradanan di AZV. “E ta loke nos ta yama un floating fee’, de Meza a sigui splica. Consecuentemente mas hende drenta e forza laboral, mas hende ta aporta na e prima y tambe na e bestemmings belasting, y menos e landsbijdrage ta bira di gobierno. Consecuentemente un reduccion den landsbijdrage, ta yuda reduci e deficit presupuestario di gobierno.

Pa loke ta e garantia cu pueblo lo kier tin cu gobierno ta realmente uza e 1% pa AZV, ta sali na cla den e asina yama ‘jaarrekeningen’ cu gobierno tin cu presenta na parlamento. Y pa loke ta e decision si e bestemmings belasting di 1% ta keda separa di e bbo actual di 1.5%, ta un decision cu parlamento tin cu tuma ainda. “Parlamento ta e unico cu por dicidi esaki y lo haci esaki tambe ora cu e ley yega serca nan” de Meza a sigura NoticiaCla.com Pues na final di cuenta, BBO por bira 2.5% of keda 1.5%, y lo bin un BB (bestemmings belasting) di 1% acerca, cobra apart riba resibonan, como parti di e ley. De Meza ta recorda cu esaki tabata e miho solucion ya cu di otro forma, manera acorda den e dialogo social y ta stipula den e protocol, lo mester a incorpora un aumento di 2 pa 3% di prima di AZV cu tur hende mester a paga. Aworaki esey no ta e caso mas.