Gerrick Croes a exigi rectificacion di 24ora.com y revela su fuente

ORANJESTAD - Ex miembro di partido MEP Gerrick Croes den corte diabierna mainta a exigi di e website di noticia 24ora.com pa e.o. rectifica un articulo publica contra dje, revela e fuente cu a conduci na e contenido di e articulo, y paga un 'voorschot' pendiente (di 50.000 florin) e resultado di e caso di fondo (bodemprodedure). E articulo en cuestion contra Croes a wordo publica for di 26 di april, pero ta awor numa Croes a dicidi di bringa 24ora riba dje. Algo cu e abogado di e website a cuestiona Croes ariba. For di Croes su comentario na final di e caso, revelacion di e fuente ta lo menos pe awor. Pero e contenido si mester wordo rectifica pa por drecha su imagen den comunidad. 

DEFENSA

Abogado Richie Kock encarga cu e defensa di (Gerrick) Croes, a mustra cu e website 24ora.com a actua di un forma incorecto, uza sensacionalismo, y no a conduci un investigacion (drechi) pa por a produci e contenido di e articulo final contra su cliente. Resultado tabata un articulo deningrante pa su cliente, yen di informacion incorecto cu a afecta credibilidad di su cliente. Como tal ta considera e website como 'inconfiabel' cu ta basa su mes riba redo. Pa ilustra su punto, e abogado a repasa casonan recien unda cu e mesun website aki mester a rectifica den un otro caso. Si e website a haci su investigacion manera mester ta, e contenido lo tabata diferente. Pa ilustra e puntonan, Kock a repasa e caso di Croes (malversacion di fondo di partido MEP), unda cu Kock a mustra cu Croes enberdad a responsabilisa su mes pa e debe, pero nunca a admiti culpabilidad di e caso ey. Pero e articulo sinembargo ta refleha cu Croes tabata e persona culpabel, y cu tur su consecuencia negativo cu por tabatin. Ademas, Kock a exigi pa e website revela e fuente, indicando cu ta e fuente mester a sali for di e seno di MEP mes. E hecho cu e informacion a lek, ta pone Kock pensa cu e informacion mester a sali for di area ey. Ademas, segun Kock, e website no por uza e parti di  'libertad di prensa' y como tal no por sconde tras di e 'fuente' sin mas. Ademas, den e articulo, e website ta te hasta pone su propio comentario cu ta dun'e un tinte aun mas serio di condena. 

HUES

Durante e caso, hues den su afan pa haya claridad, a e.o. cuestiona e asunto di fuente, indicando cu ta bien posibel cu tin un grupo relativamente grandi di persona cu tabatin e informacion por a lek eynan tambe. A sali afo cu ta posibel cu mirando cu e informacion cu a wordo uza, a wordo trata den un reunion di partijraad di e partido geel, ta nifica cu por lo menos 29 persona presente tabatin e informacion y cu nan por a 'comparti' e informacion ey. "Ta posibel cu nan lo por a haci esaki na nan cas y cu asina e informacion a plama toch?" hues a sigui bisa. 

DEFENSA DI 24ORA

Durante defensa di e website 24ora, e abogado Gwendeline Croes a cuminsa na splica cu riba e asunto di rectificacion den un caso anterior, e caso ey a wordo 'apela' pa e website pues, pa mustra cu e no ta comparti e sentencia di rectificacion. Como tal tin suficiente punto den e caso cu ta hustifica cu e website por a haya su informacion y for di eynan, traha su articulo. E caso di (Gerrick) Croes tabata asina compleho, unda cu tabatin asina hopi version di loke a sosode y cu un (of mas) di e versionan ey lo por a plama y cu por a sali cu e website lo por a uza.  Pues e acusacion cu tin 'un fuente' ta dificil pa kere y cu como tal mester declara e acusacion ey como no admisibel. Ademas, e mesun Croes ta manda invitacion pa prensa completo pa invita prensa pa bin e caso y spera un declaracion di Croes mes. Pues e mes ta yuda cu suministro di su caso. Loke tambe ta pisa hopi segun Croes (abogado) ta cu Croes (demandante) a tarda mas di 3 luna pa acusa e website, siendo cu pa e mesun asunto si a demanda e partido geel mesora ora cu e acusacionan a cuminsa plama den prensa. Y finalmente, hecho ta cu Croes (demandante) ta wordo acusa di malversacion. E hecho cu esaki a keda publica no ta cambia nada. "Si esaki no a bay den publicidad mes, e lo no a cambia e situacion pa (Gerrick) Croes" abogado Croes a bisa. 

DECLARACION DI GERRICK CROES

Croes den corte (Y despues pafo) a hiba palabra, splicando cu en berdad el a acerca prensa pa medio di un relato di prensa, pero eyden el a splica solamente cu el a bandona e partido sin duna detayes di e caso mes (di malversacion). "Esey tabata e unico motibo" Croes a sigui bisa hues. E intencion no tabata pa busca mas publicidad ni plama e storia di malversacion, pasobra tabatin un acuerdo cu e partido pa tene e asunto aki interno. "Mi nunca no a wordo condena ni culpa di malversacion. Mi a scoge si pa un solucion 'elegante' door di admiti e debe causa, pero no cu mi ta culpabel di malversacion" Croes a sigui bisa. Pafo di corte, Croes a mustra cu e motibo pa papia cu prensa, tabata pa splica comunidad di e caso (prome biaha) y 'limpia su nomber' di tur e loke ta y a wordo publica den prensa particularmente 24ora.com, cu e ta condena severamente. Hues a bisa cu ta purba tin un sentencia otro siman diabierna mes, of mas tarda, e siman despues.