Street soccer y torneo amateur di domino na S.V. Universal

POS CHIQUITO– Probechando di e temporada di vakantie aki, tanto pa hoben como adultonan, directiva di Club Universal ta organisa un evento pa habitantenan di bario y Aruba en general.

Ta trata di street soccer compaña cu un torneo di domino, cualnan lo tuma luga riba 29 y 30 di juli awor. Hoben y adultonan ta wordo encurasha pa forma nan team di 6 hungado, mucha homber y mucha muhe, cualnan lo hunga street soccer riba diabierna y diasabra anochi (29 y 30 di juli) di 7:00 pa 10:00. Mientras cu e weganan di streetsoccer ta andando riba e cancha na aire liber di Club y paden tin e gruponan di domino participando den un mini torneo. SV Universal ta invita tur futbolistanan masculino y femenino pa participa den e evento agradabel aki. 

Esnan interesa, por manda nomber di nan team y hungado (sea street soccer of domino) na svuniversalaruba@gmail.com of subi facebook di svuniversal y laga un mensahe eyriba. 

E ta priminti di bira un anochi interesante y yena di ambiente, cu musica agradabel, bar y cushina ta habri. Tur hende ta ser invita pa bin pasa un rato agradabel. Y si bo no ta interesa pa participa den Street Soccer of Domino, simplemente sinta na bar y wak riba pantaya grandi e wega di Boston Red Sox contra Anaheim Angels. E ta dos anochi di alegria y pasa rato dushi den forma social.