Pa motibo di seguridad, Festival Nuevo Mundo a muda pa Aruba

ORANJESTAD - Desde 2015, e organisadornan di e Festival Nuevo Mundo, cu originalmente a cuminsa na e ciudad di Maracaibo, estado Zulia na Venezuela, a dicidi di cambia di escenario. Nan a laga nan luga di origen pa muda pa Aruba y ya caba na 2016 nan ta celebrando nan di dos edicion den e Cas Di Cultura di e isla.

Pa rasonnan economico y di seguridad e festival a resulta di no ta posibel mas na Venezuela, dor cu esnan cu tabata patrocina esaki no a sigui haci esaki mas, ni tabata tin e condicionnan necesario pa sigui cune. Na 2013 y 2014 no tabata tin festival.

Asina e idea a surgi pa continua cu e iniciativa aki na Aruba, Clyde Harms, presidente honorario di Nuevo Mundo, Festival y Academy a splica, kende a reconoce como hopi importante e esfuerso haci na Venezuela.

Simón Gollo, director Artistico di e festival, a mustra cu den e prome edicion na 2015 -na Aruba- a atende 55 studiante y 13 maestro. E aña aki e cifra a subi na 80 studiante y 23 maestro. "Evidentemente nos tin un crecemento, e ta un proyecto cu ta creciendo pa loke ta nos historia y a la ves renaciendo pasobra nos ta na un luga nobo".

E aña aki, for di 14 te cu 22 di juli un grupo grandi di musico, di diferente pais, a reuni pa ricibi les di maestro destaca y pa participa na e conciertonan.

E programa a cuminsa 14 di juli cu e presentacion di “La Catrina Quartet” cu integrante Daniel Vega-Albela (violin); Simón Gollo (violin); Jorge Martínez (viola), y Jorge Espinoza (cello).

15 di juli a sigui cu participacion di e ganadornan di e competencia di e festival na 2015: Andrea Hudges (violin) cu a resulta e ganadora di aña pasa y Renato Moscott (cello) cu a obtene e segundo luga. Tambe tabata tin como invitado e artista Armand Simon, pianista.

Diasabra 16 di juli tabata tin e competencia entre un grupo di musico, mayoria di nan basta jong. E resultado di e evaluacion di e hurado a wordo haci publico dialuna 18. E prome luga a bai pa dos musico, e clarinetista colombiano Juan Sebastián Cortés y el cellista venezolano Renato Moscott . E segundo luga a bai pa e fagotista venezolano Luis Manuel Márquez. Den e categoria di escohencia di e publico, e prome luga a bai pa e pianista Claudia Roa (Chile).

Dialuna 18 di juli e festival a continua cu e presentacion di “Aruba Chamber Orchestra” cu a wordo dirigi dor di e colombiano Carlos Botero. Den e concierto aki esnan presente a disfruta di e Sinfonia Concertante pa violin, viola y orkesta (E flat major K 364) di W.A. Mozart y cu a wordo interpreta dor di e violinista Dmitri Berlinsky y e violista Richard Young.

Diamars e programa a permiti pa e NMFA 2016 Brass Quintet wordo scucha, cu e integrantenan Jean Christophe Dobrzelewski, Rebeca Palmer, Ian Zook, Philippe Massart y Jonathan Fowler. Tambe a presenta un trio di musico venezolano: Germán Marcano (cello),  Jesús David Medina (contrabajo) y Francisco Fernández (cuatro).

Diaranson anochi, tabata na beurt e maestronan di e festival. Beethoven Septet Faculty Concert a interpreta Septet in E-flat major, Opus 20 di L.V. Beethoven. Jorge Montilla (clarinet); Ian Zook (horn); Ryan Romine (Basson), Netanel Draiblate (violin); Richard Young (viola), Germán Marcano (cello) y George Amorim (Double Bass) a wordo aplaudi grandemente dor di e publico presente. Ademas a presenta varios studiante di e festival aki.

Diahuebs e festival a continua cu un concierto titula “De Bach a Ginastera” cu tabata tin como solista e pianista Edith Peña, e violinista Dmitri Berlinsky y e cellista Marcio Caneiro. E escenario e biaha aki tabata abordo di e barco Freewinds Cruise.

Diabierna  e Festival Nuevo Mundo Aruba 2016 a conclucu e presentacion di Aruba Symphony Orchestra pa 8:00 pm den Cas di Cultura. Foto cortesia Clyde Harms.