Parlamento ta trata ley all inclusive dia 19 di augustus

ORANJESTAD - Despues di basta speculacion, tin un fecha pa trata e cambio di ley di all inclusive. E fecha cu Parlamento a pone pa trata e ley aki, ta dia 19 di augustus proximo. Esey ta nifica cu e por ta e prome ley cu ta wordo trata despues di e periodo di reces. No ta conoci si prome cu esey por trata e leynan referente e deal di CITGO, ya cu a pone Parlamento riba un 'standby' pa trata esaki durante reces ainda. Pa loke ta e ley di all inclusive, minister di turismo Otmar Oduber y vice presidente di Parlamento Chris Dammers ambos a confirma diahuebs merdia cu e ley enberdad ta poni pa tratamento. 

PAKICO PURA PA E LEY AKI WORDO TRATA

Tabata e siman aki ainda cu NoticiaCla.com a raporta e necesidad di trata e ley aki pura segun minister di turismo, mirando cu den e proximo 4 simannan ainda companianan lo por converti propiedadnan hotelero den uno completamente all inclusive. Contrario na pensamento cu tin tempo despues di reces pa pasa e cambio di ley di all inclusive, e mandatario ta sigui pensa cu e tardansa aki por tin consecuencia serio pa Aruba. "Ami si ta bisa cu tin un pura. Y no ta un pura unicamente pa all inclusive" Oduber a sigui bisa. E ta referi na e menasa cu den e periodo aki hotelnan por wordo bendi na companianan all inclusive. Pa motibonan legal no por menciona e dos companianan, pero e mandatario ta sigura cu nan tin nan 'wanta' pa no haci e 'move' ainda pa converti dos propiedad all inclusive. NoticiaCla.com a compronde sinembargo cu un di nan ta Holiday Inn, y posiblemente The Mill Resort.  

WANTANDO COMPANIANAN  

Segun Oduber tin dos compania cu abogadonan cu tin 'compromiso' cu su oficina ta purbando pa 'wanta te caminda cu por'. A puntra e mandatario si ta wantando esaki durante e periodo di reces (cu ta 4 siman mas) of pa un periodo mas largo, y kico ta e pura cu e mandatario tin. E mandatario aki a tira e responsabilidad riba Parlamento. "E responsabilidad awor ta na Parlamento. E ley ta na Parlamento pa dos luna. Si algo mester sosode (den e 4 simannan aki) mi lo lament'ele. Pero mi no ta kere cu gobierno mester keda carga e responsabilidad si parlamento na su turno, no ta haya cu nan tin suficiente informacion pa por yama e reunion y trata e ley" Oduber a sigui bisa. "E menasa t'ey. Esey ta confirma" Oduber a bisa. Ora cu a puntra e mandatario si e ta referi na e 4 simannan cu falta, e mandatario a contesta: "E por pasa mayan mes. E por sosode anytime. Mi ta spera cu nos por wanta e companianan aki 'entretene' pa nan no tuma e desicion", e mandatario a sigui bisa. Te awor, e mandatario ta wak respet di dos di e resortnan aki pa bisa cu nan no ta bay apresura algo cu mayan nos ta bay keda cu un relacion porta menos bon cu gobierno. "Pero atrobe, e responsabilidad awor ta colga riba parlamento. E ley ta bay mas leu di all inclusive, incluyendo 'other accomodations'".