Doble via di green corridor lo e.o. elimina accidentenan frontal

ORANJESTAD – E dobel via di green corridor lo percura pa un miho fluho di e trafico pisa entre San Nicolas y Playa y practicamente ta elimina accidentenan frontal. Asina gobierno pa medio di un comunicado a laga sa diahuebs atardi. Segun e comunicado, den e estudio haci prome cu e proyecto a wordo otorga, a constata cu diariamente tin rond di 24 mil vehiculo ta sali di pariba pa bay Playa. Durante un bishita na e sitio, gobernantenan a actualisa nan mes riba e desaroyo. 

BRUG 

E prome punto di bishita tabata na e parti abou di e actual brug, unda un team ta trahando pa crea e brug moderno den forma di arco cu lo wordo arma y incorpora den e caminda di dobel via cu ta construyendo di aeropuerto pa Savaneta te San Nicolas. 

LINEAR PARK

500 meter prome y 500 meter despues di e brug actual ta keda bashi pa cual Gabinete Mike Eman II a pidi e compania di ODINSA pa construi un Linear Park cu ciudadanonan di principalmente pariba di brug por uza pa mantene curpa den condicion of simplemente disfruta di e escenario den compania di famia. 

TRABOU SEGUN SCHEDULE

Segun e contratista y Gobierno, e proyecto Green Corridor ta canando segun schedule y lo finalisa manera a keda programa. Pa e motibo aki, esnan cu ta uza e caretera di San Nicolas pa Playa por constata cu tin construccion andando simultaneamente na e brug, Pos Chiquito y Savaneta loke ta encera cu e proyecto ta bay wordo entrega den fase pa e por cuminsa wordo uza, permitiendo un miho fluho di trafico.