NoticiaCla.com tin otro motibo pa celebra e siman aki!!

ORANJESTAD - Dos aña despues cu Wired Media a lansa e website noticioso www.noticiacla.com, y apenas 2 siman y mey cu nos a celebra esaki, nos ta contento pa raporta cu nos a yega un otro 'milestone'. Esaki ora cu diaranson NoticiaCla.com su pagina di FACEBOOK a yega y surpasa e cantidad di 10.000 hende cu a 'like' e pagina di FACEBOOK di noticiacla (NO CUMPRA), cu ta orguyese nos hopi mes. Nos ta bisa 'no cumpra' pasobra no a paga pa ningun di e likesnan (esaki ta un posibilidad tambe) y como tal, tur ta geniuno. E ta mustra mesora tambe e aceptacion cu e website a haya via FACEBOOK den un tempo relativamente corto. Notabel tambe ta e rapidez con esaki a sosode. Si na comienso esaki a bay un poco mas lento, ya e ultimo lunanan, e cantidad a cuminsa subi impresionantemente lihe. 

GRADICIMENTO

NoticiaCla.com pa medio di Wired Media kier a gradici tur persona cu a yuda aporta na e exito aki, cuminsando cu e patrocinantenan cu a y ta hincando nan confiansa den e producto aki, sigui pa e siguidornan cu ta aumentando mas y mas. Hopi notabel ta e respet cu el a crea entre su propio colega y competencia, y sigur di fuentenan di noticia di exterior cu mas y mas (y den cierto caso exclusivamente) ta uza NoticiaCla.com como nan fuente di noticia di confiansa. Tabata comienso di e luna aki apenas cu a recorda e di dos aniversario y ya practicamente algun siman despues, ta celebra otro logro grandi. Danki un biaha mas, y nos ta sigui pa e siguiente logro di 15.000 likes y mucho mas cos na caminda!