ATA ta encurasha turistanan sigui busca pokemon na Aruba

ORANJESTAD - Pa no keda atras riba e fenomeno mundial di Pokemon, oficina di turismo di Aruba a dicidi di capitalisa riba esaki tambe y uza e furia aki den un forma 'positivo' y encurasha bishitantenan pa sigui nan odisea sin cu tin cu interumpi nan vacacion. Oficina di turismo via un blog riba nan website www.aruba.com, desde e siman aki a cuminsa propaganda nos isla como un isla unda cu 'fuera di por pasa un bunita vacacion' cu e tin suficiente localidad yena cu pokemon pa bo sigui bo odisea di captura un pokemon. Completo cu descripcion di por lo menos 4 sitio central na Aruba y un mapa completo detaya unda tur por haya nan, e oficina di turismo ta encurasha turistanan pa busca e pokemon riba nos isla.

CAPITALISA RIBA FURIA DI POKEMON

Segun e blog oficial riba e sitio di ATA, ta haci mencion di 'e furia di e wega mobil di Nintento cu a cuminsa dos siman pasa cu su lansamento. "Di abuelo te na nieto, tur hende nan meta principal pa e ultimo 2 simannan tabata pa gara mas tanto pokemon cu ta posibel" e blog ta bisa. Y e no ta keda eynan so. E ta te hasta ofrece bo un lista di hotspot unda tur por haya e bestianan cybernetico aki. "Aki tin algun di e hotspotnan cu ta yudabo haya nan" e blog riba e website ta  bisa. Nan ta menciona Oranjestad, San Nicolas, Palm Beach y Parke Arikok como e 4 sitionan mas popular.  

E SITIONAN

Notabel ta con ta combina cada sitio su potencial cu e buscamento di pokeman. "Haci compras y busca pokemon mes momento" e blog ta bisa. "Downtown Oranjestad tin e miho tiendanan y un cantidad di pokemon". Pa loke ta Palm Beach, e blog ta referi na e cantidad di restaurant cu ta ofrece wifi gratis, cu ta lagabo hunga e wega sin cu bo mester gasta bo data. "Descubri Aruba su restaurantnan renombra y haya multiple Pokemon na caminda. Si bo ta kedando na e hotelnan highrise, bo tin suerte pasobra nan ta hotspot pa pokemon". Pa loke ta Parke Arikok, e blog ta informa cu bo por descubri e naturalesa di nos isla, mientras cu bo ta haya bo pokemon. Na San Nicolas, e blog ta sigura cu tin un cantidad di pokemonstops incluyendo Rodgers Beach y Baby Beach. "Disfruta un dushi dia na nos beachnan blanco mientras bo ta aumenta bo conteo di    pokemon. Despues di un dia largo di sightseeing y buskeda di pokemon, relaha na beach" e blog ta finalisa bisando. Pues claramente ATA ta purba capitalisa riba e bishitante cu ta enlokese cu pokemon y ainda kier disfruta di un bon vacacion.

E FURIA MES

Manera cu NoticiaCla.com a raporta caba, tabata den añanan 90 cu e frankisia di Nintento a bira popular, y awor ta haci un re-aparicion pero mucho mas grandi y conoci e biaha aki como Pokémon Go. E popularidad di e version aki, ta cu e ta live y ta pone bo bira activo y cana y busca e pokémon pa catch e. Pokémon Go ta uza e GPS y holoshi di bo telefon y ta detecta unda bo ta fisicamente y den e wega y ta laga e pokémon aparece rond dibo, riba bo pantaya. Segun bo ta cana rond en busca di e pokémon, mas ta aparece riba bo pantaya, dependiendo unda bo ta y ki ora di dia. E idea ta pa encurashabo pa biaha rond den mundo real y gara e pokémon nan. E combinacion di un wega combina cu mundo real ta wordo yama realidad aumenta. 

POPULARIDAD

Loke ta haci'e popular ta cu e ta pornada y facil pa download. Ademas pa amantenan di Pokémon di pasado, e ta realisa un fantasia di nan cu nan tabatin for di ora cu e prome wega a sali. 

PELIGRO

Peligro ta cu den e wega bo por incorpora cierto aspecto pa otro hende haya bo. Y cu esaki,  ladronannan ta pretende di ta hunga e wega cu bo, y ora cu nan haya bo, nan ta sea hortabo, violabo of den caso extremo, hasta mata bo. Varios persona a haya nan morto caba cu e wega aki. Como tal e compania conciente di e problema, ta sugeri cu ora cu bo bay 'trip' pa haya e pokémon, bo no bay bo so, sino cu un hende. 

NA ARUBA

E wega ta disponibel y ta funciona na Aruba tambe, aunke cu su popularidad ainda no ta asina grandi. E fenomeno peligroso si a hala atencion mesora y na Aruba hende ta mas bien haci bofon di e locura cu esaki a crea. Esey no ta kita afo cu e wega ta uno popular y cu na Aruba tambe e ta funciona. E wega ta obtenibel tanto pa android como iphone.