Grupo di NGO kier gobierno para proyecto na Isla di Oro

ORANJESTAD - Un total di 5 NGO (Non Gubernamental Organisations) a mustra nan desaprobacion pa cu e proyecto hotelero na Isla di Oro conoci como Zoetry@Isla di Oro, y a informa gobierno di esaki na luna di mei cu e peticion pa pone un paro na esaki. Fuera di esey, a informa e desaroyado di e proyecto tambe di e protesta aki. NoticiaCla.com tin un serie di email cu ta mustra e trafico di comunicacion entre gobierno, e organisacionnan y tambe e desaroyado riba e topico aki, unda cu por deduci cu tin un desacuerdo entre partido pa cu e proyecto y e pensamento di varios di e instancianan aki. 

MESTER PARA PROYECTO

Den caso di gobierno, NoticiaCla.com a compronde di parti di por lo menos un minister cu e ta desmenti e caso aki di e protesta di 5 grupo aki consistiendo di entre otro Aruba Marine Mammal Foundation, Turtugaaruba, Aruba Marine Park Foundation, Aruba Reef Care Foundation y Aruba Birdlife Conservation, indicando cu 'esaki no ta berdad'. Loke si gobierno a confirma na maart di 2015 na NoticiaCla.com, ta cu e proyecto tabata 'aproba' y tabata conta cu sosten di gobierno. Di parti di e desaroyado di e proyecto, e ta splica e gruponan preocupa cu e ta dispuesto pa sinta cu nan pa splica nan e asunto y contesta cualkier pregunta cu nan por tin. E gruponan ta mustra di nan banda cu nan simplemente kier pa para e proyecto mirando e daño cu e lo haci na nos naturalesa, y cu mas importante, e ta parti di un di e 16 areanan cu Parlamento a aproba den un mocion pa proteha como areanan berde. 

RETRASO DEN PROYECTO 

Tabata algun tempo pasa (april di e aña aki) cu e desaroyado di e proyecto a informa NoticiaCla.com cu enberdad tin un retraso di e proyecto, ya cu ta sperando riba e cambio di ROP (Ruimtelijk Ontwikkelings Plan) y cu tanten cu esaki no ta cla, no por cuminsa ainda. E ta lamenta esaki tambe mirando cu debi na e tardansa, Jamaica ta cla pa cuminsa un proyecto similar, siendo cu Aruba lo mester a bira e prome den e region cu un tipo di proyecto asina. Prome cu esey, tabata na april un aña prome (2015) cu e desaroyado a duna NoticiaCla.com un bista amplio di kico e proyecto ta ensera y con exactamente lo atende cu e problemanan ecologico cu posibel gruponan ta protesta ariba.