Reunion tripartite parlamentario na St Maarten sin sosten di oposicion

ORANJESTAD – E proximo reunion tripartite parlamentario na St Maarten no ta conta cu sosten di partido di oposicion di Aruba, esta MEP. Como tal tin un division den parlamento di Aruba pa loke ta e biahe proximo cu un delegacion di Aruba lo ta haciendo pa St Maarten, y e ta basa riba e motibo y topico di e bishita mas bien. Partido AVP a confirma na Noticiacla.com cu un delegacion di miembro di parlamento ta biahando proximamente pa St Maarten pa un reunion tripartite. Di otro banda partido MEP a sigura NoticiaCla.com cu nan no ta forma parti di e delegacion ey, pues no por yame un delegacion di parlamento di Aruba sino un delegacion di parlamentario di AVP solamente.

E base di e bishita segun lider di fraccion di AVP Rene Herde na Noticiacla.com ta cu tin cu bay atende e problema actual entre Hulanda y Aruba unda cu segun Herde, decisionnan unilateral y inconstitucional cu gobierno di Hulanda a tuma, a ‘crea un situacion indesea entre e paisnan di Reino Hulandes’. Como tal nan, Herde ta bisa cu ‘tabatin reunionnan entre miembronan di parlamento di Aruba, Corsou y St Maarten’ recientemente. Aki a dicidi cu ta tene un reunion tripartite, fecha pa 18 di augustus 2014 na St Maarten. Herde no por a comparti mas detayes te diaranson atardi, ora cu e tuma contacto bek cu Noticiacla.com .

Mientrastanto lider di e partido di oposicion MEP, Evelyn Wever a informa Noticiacla.com diaranson mainta cu su partido no ta participa na e reunionnan aki. “Nos no ta participa pasobra primordialmente e motibonan cu AVP ta uza no ta genuino” Wever ta cuminsa na bisa. Tambe, e constelacion di e comision ta un problema pa e partido heel. “AVP ta paga un experto, sr Mito Croes bastante placa pa biaha cu 5 parlamentario di AVP, pa purba influencia opinion di e parlamentarionan na St Maarten y Corsou. Mito Croes no ta conta cu nos confiansa especialmente pasobra e ta consehero di gobierno y esaki no ta cumpli cu e posicion independiente di parlamento (scheiding van machten). E foto di archivo ta di e ultimo reunion tripartit entre Aruba, St Maarten y Corsou na april di 2014 na Aruba cortesia di notisiarapido.info.