Desaparicion Natalee Holloway comberti den un 'musical' na New York

NEW YORK - Despues di 11 aña di desaparicion di Natalee Holloway, pa straño cu por zona, e noticia a converti su mes den un obra teatral cu lo debuta na broadway, y titular 'apropiadamente' Holloway. Dia 14 di augustus proximo e club conoci como 'Feinstein's/54 Below' lo presenta e obra aki. Segun e descripcion, e ta un obra contemporaneo pop, basa riba e eventonan di desaparicion di Natalee Holloway na 2005 na Aruba. Aki na Aruba mientrastanto tin repudio pa esaki mirando con ta uza Aruba den un forma negativo pa ilustra un tragedia cu ainda no tin solucion. 

E OBRA

Segun descripcion di e obra, e ta un 'musical' di pasion, speransa y amor y ta cuminsa cu e pregunta di kico ta e nificacion di 'kier biba'. E obra ta cubri e periodo di 2005 te 2010, y ta basa riba un grupo di teenager cu ta biaha pa Aruba durante un 'schoolreisje'. Aki ta presenta e detayes di e loke a sosode ora cu Holloway ta 'core bay cu un local y ta desaparece y cu su mama Beth ta lidera esfuerso di buskeda di su yiu.  

UZANDO TRAGEDIA DEN PROBECHO Y CARERA NOBO

For di tempo di e desaparicion, ta conoci cu a traha varios pelicula pa television riba e suceso aki, y tambe tin varios buki publica riba e evento aki. Su mama Beth a practicamente dedica su bida na presentacionan riba e tema y de facto a haya un 'trabou nobo' riba custia di e desaparicion di su yiu muher. Mescos a pasa cu John Walsh ora cu su yiu Adam a disparce y a wordo haya morto despues. Walsh awendia ta un presentador popular di programanan y asina a haci un carera di e morto di su yiu.