TUI Group: Si ley all inclusive pasa, turistanan lo bay otro caminda

BERLIN - Pa medio di un carta pa prome minister Mike Eman, TUI GROUP ,-cu ta considera su mes como e grupo di operador mas grandi di turismo integra-, ta alerta cu si parlamento pasa e cambio di ley di all inclusive cu turistanan lo bay otro caminda en bes di Aruba. Den e carta, e ta inclui un estudio extensivo cu ta indica e punto cu TUI ta haci. 

ESTUDIO

E estudio ta relata con e posicion actual di all inclusive ta na mundo y den Caribe y ki efecto e tin pa paisnan cu no participa den esaki. Mes momento TUI ta recorda prome minister Eman di e impacto cu nan tin na Aruba, repasando e cantidad di partner cu nan tin na Aruba. Ta haci mencion di 16 hotel, di cual 2 nan ta doño di dje (RIU), y cu nan ta ofrece 6 buelo charter pa siman, y pa e proximo temporada, dos crucero Aleman cu lo bishita nos isla 28 biaha. Mientras cu nan no ta bisa cu palabra specifico den e carta, TUI ta mustra cu nan kier continua ta un partner strategico cu Aruba, pero cu pa esaki sosode, e ley proponi no por pasa. Y nan ta dispuesto pa papia y discuti esaki cu gobierno di Aruba proximamente. Lesa e carta aki.