Recepcion na Hulanda pa studiantenan nobo di Aruba, St Maarten y Corsou

DEN HAAG\AMSTERDAM - Den stadhuis di Amsterdam a tuma lugar diaranson merdia (ora di Hulanda) un recepcion pa e studiantenan di Curaçao, St. Maarten y Aruba. Den e sala di reunion di e municipio di Amsterdam wethouder Simone Kukenheim a yama tur e studiantenan bon bini. E recepcion a conta cu presencia di directora interino di Gabinete di Aruba Shandra John, hefe di departamento di Enseñansa di Gabinete di Aruba Samuel Dumfries y e mentornan pa Amsterdam Lourdes Bramble-Tromp y Edy Ranada.

Den su discurso na e studiantenan sra. Kukenheim a referi na su mesun periodo – 10 aña pasa – cu e a bin studia na Amsterdam. ‘E ciudad aki ta hopi leuk, e tin un bida pa studiante hopi agradabel y e ta brindabo oportunidadnan pa cu bo por saca mas beneficio for di bo estudio.’ Tambe e wethouder a bisa e studiantenan pa cera amistad nobo, un medio pa por logra esaki ta pa bira miembro di un organisacion pa studiantenan, manera Hvanti cu ta un organisacion pa studiantenan Hulandes Caribense. Sra. Kukenheim a mustra ariba e hecho cu Amsterdam como ciudad ta ofrece hopi lugar pa core stage. ‘Boso por busca companianan of organisacionnan pa stage tambe pafor di Amsterdam y hasta pafor di Hulanda. Europa ta brinda hopi oportunidad pa cu esaki,’ asina e wethouder a bisa. Por ultimo wethouder Kukenheim a haci un apelacion na e studiantenan pa cualkier problema cu nan tin, pa nan acudi na nan mentor of nan studiebegeleider na nan scol. Esaki ta di cuater aña cu municipio di Amsterdam ta organisa e recepcion aki pa e grupo nobo di studiantenan di e parti Caribense di Reino Hulandes.