ATA considerando aumento fondo pa sigura zona turistico contra crimen

ORANJESTAD -  Aruba Tourism Authority ta condena e actonan di atraco riba turista. Asina e CEO di ATA Ronella Tjin-Asjoe a sigura NoticiaCla.com como reaccion riba e atraco riba turistanan dialuna anochi y violencia na un area turistico den fin di siman. Segun Tjin-Asjoe, a tuma contacto caba internamente pa wak kico ATA por haci y con pa contra aresta esaki. E CEO ta sigura cu a cuminsa sondea cu AHSF Aruba Hospitality and Security Foundation, mirando cu ATA ta contribui substancialmente na e fondo di e fundacion aki anualmente (720 mil florin). "Nos ta considerando aworaki incrementacion di esaki" Tjin-Asjoe a bisa. 

AUMENTA FONDO

Mirando e situacion, ATA kier ta sigur si cu un aumento di fondo en berdad por yuda combati e situacion fastioso cu tin aworaki. E plan aproba e aña aki por yuda drecha e situacion. Mes momento tin reunionnan tumando lugar pa analisa e status y progreso di e plan aki y con leu ta cu e implementacion. Ta papia entre otro di ponemento di toren cu tin cu bin riba diferente zona den nos area di playa. Tambe mester pone cosnan adicional pa un solucion 'agudo'. Ta papiando tambe di un posibel squat team, cu por wordo activa hopi liher. Segun Tjin-Asjoe no ta intencion pa tuma over e rol di polis of seguridad, sino mas bien asisti cu fondo y yudanda y pa sigura cu tin atencion riba atencion den zonanan turistico. 

SITUACION FRUSTRANTE

E CEO ta admiti cu mientras cu ta inverti un capital na seguridad, e por ta frustrante pa mira cu asina mes tin situacionan cu ta sosode cu ta mina e seguridad di nos turismo. "Sigur cu si" Tjin-Asjoe a contesta. E ta mustra cu e ta conciente cu ta un incidente asina mester sosode pa stroba tur esfuerso cu ta wordo inverti aden. "Nos ta conciente cu seguridad ta un aspecto masha critico ora cu tuma desicion unda cu bo ta bay cu bo famia y pareha durante vacacion. Nos ta conciente cu un noticia negativo of un serie di nan, ta pisa mas cu noticianan positivo" Tjin-Asjoe a sigui bisa. 

CONTROLA NOTICIANAN NEGATIVO

E forma con ATA ta controla e tipo di noticia negativo, segun e CEO, ta via plataformanan online y offline a base diario. "Nos sa exactamente kico ta wordo bisa di Aruba, na ki momento, y den ki contexto" Tjin-Asjoe a bisa. Den caso di e loke a sosode e weekend aki, hopi lihe ta haya sa di cualkier posibel daño cu a wordo haci.