Polemica pa motibo di cara di Betico Croes riba cedula nobo

ORANJESTAD - Cu e binimento di e cedula riba mercado, a bin tambe un asunto mas sentimental na discusion cu ta creando un posibel polemica. Ta trata di e cara di Betico Croes efm patras di e cedula nobo. Hopi ta critica esaki y puntra pakico no a opta pa un simbolo 'mas neutral', y ta mustra cu lo no kier busca un cedula nobo pa e motibo ey. Reaccion na NoticiaCla.com sinembargo di parti di hefe di Censo, ta splica cu e presentacion actual di e cedula ta conforme e ley cu ta stipula kico ta aparece riba e cedula, incluyendo e cara di Betico Croes. 

LEY TA STIPULA KICO TA APARECE RIBA CEDULA

Segun hefe di Censo Sharin Luydens, ta for di 2003 e ley ta stipula kico ta aparece riba e cedula di Aruba, y e diseño segun e compania Enschede SU cu tabata traha e ID y e rijbewijs e tempo ey na Hulanda. Tur dos documento tabata wordo traha riba machinnan grandi na Hulanda. "E potret di Betico y tur e normanan cu mester atene bo mes na dje, ta prescribi pa ley segun articulo 1, 2, 3, 5  di nos landsverordening, y articulo 4 cu ta prescribi na ki kenmerken y formato e ID mester tene su mes na dje" Luydens a bisa. "Y un di nan ta bisa cu 'een afbeelding van wijlen de heer G. F. Betico Croes op de achterzijde", fuera di tur e otro rekisitonan. 

A OPTA PA NO CAMBIA LEY

Ora cu a bay pa traha e cedula na Aruba mes, a wordo dicidi tambe pa minister responsabel (minister president) esta Mike Eman, cu e diseño ta keda mescos. Esaki siendo cu Eman cu manera ta conoci, ta di e partido contrario na cual Betico Croes efm tabata pertenece, esta partido MEP. Pues hasta Eman tabata conciente di e situacion y a opta pa mantene esaki manera cu e ta.  "E ora nos no mester bay cambia e ley pa pasa e proceso den parlamento. E lo a tarda e proceso pa yega na un cedula hopi mas" Luydens a sigui bisa. Pues pa ley, ta prescribi pa e potret di Betico Croes ta riba e cedula y cu a dicidi cu no ta cambia e ley. Esey no ta kita afo cu e asunto a crea un polemica basta fuerte unda cu cantidad di hende a bisa cu no ta interesa pa busca cedula mas, pa motibo di e potret ey. No por bisa con grandi e grupo aki ta, pero cu ta suficiente pa mester a duna un splicacion di e motibo di e potret riba e cedula. Pa cualkier informacion di e cedula nobo y con pa haci afspraak, por subi riba www.censo.aw .