Gobierno a cuminsa coopera cu CFT

ORANJESTAD – Gobierno e siman aki a cuminsa coopera cu e secretariado di College Financieel Toezicht (CFT) pa nan por haya informacion relaciona cu e investigacion di e presupuesto 2014. Esaki despues cu inicialmente a protesta contra esaki. “Nos enberdad a cuminsa coopera e siman cu a pasa aki” de Meza a confirma na NoticiaCla.com. Mes momento de Meza a ripiti nan obhecion di con e proceso a cana. “Nos a bisa tambe cu bo no por coopera cu algo cu ta bay contra nos statuut’.

Tumando e banda pragmatico di e asunto, de Meza a bisa cu semper tabata habri pa habri buki y haci cualkier investigacion conhuntamente (mirando cu ta trata di algo netamente interno segun tratado y ley). “Na tur momento cu tin bon understanding, locual tin mas y mas na e momentonan aki cu Hulanda y gabinete di gobernador cu nos lo tin participantenan. Den e sentido cu ta monitoria e proceso tambe y cu consehero di Aruba ta bay ‘werk mee’ na e necesidadnan cu tin pa cu e secretariaat aki” de Meza a bisa. “Nos lo coopera pero bou di un protesta di e aanwijzing pa duna nan e ruimte” e mandatario a sigui splica NoticiaCla.com . E decision cu a cay pa yuda a cay entre siman pasa cu e siman aki. E mandatario a reitera cu ‘nunca nos no tabatin nada di sconde’. “Pero nos ta reitera si cu tin cu respeta nos regla y normanan”.

NoticiaCla a compronde tambe cu e hecho cu awor numa a duna e lus berde pa yuda cu e proceso di investigacion, cu logicamente e trabounan di e secretariado no ta bay keda cla na tempo, pues no pa fin di augustus manera cu inicialmente a keda acorda.